8 июл Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар доираи сафари корӣ ба шаҳру ноҳияҳои вилояти Суғд ба ноҳияи Бобоҷон Ғафуров ташриф оварданд.

Дар ин ҷо нахуст Сарвари давлат бо бардоштани парда аз рӯйи лавҳаи рамзӣ ба фаъолияти коргоҳи нави истеҳсоли орд барои макарон дар назди Ҷамъияти дорои масъулияти маҳдуди «Ирода Инвест» расман оғоз бахшиданд.

Коргоҳи мазкур дар доираи татбиқи ҳадафи чоруми стратегии мамлакат-саноатикунонии босуръати кишвар ва бо истифода аз сармояи дохилӣ бунёд гардидааст. Иншоот дар масоҳати 2500 метри мураббаъ сохта шудааст.

Ба Пешвои миллат муҳтарам Эмомалӣ Раҳмон иттилоъ дода шуд, ки коргоҳи нав бо таҷҳизоти замонавӣ муҷаҳҳаз буда, иқтидори коркарди то 200 тонна гандумро дар як шабонарӯз дорад. Дар корхона бинои осёб бо таҷҳизоти пурраи коркарди гандум, анбори нигоҳдории ашёи хом бо ғунҷоиши 600 тонна ва анбори нигоҳдории маҳсулоти тайёр мавҷуд мебошад.

Таъкид гардид, ки орд дар ин ҷо асосан, аз гандуми навъи дурум омода гардида, барои истеҳсоли макарон, хамираи питса, баъзе навъҳои нон, самбӯса ва дигар маҳсулоте истифода мешавад, ки устуворӣ ва сифати баланди хамирро талаб мекунанд. Ба роҳ мондани чунин истеҳсолот имкон медиҳад, ки талаботи бозори дохилӣ бо маҳсулоти босифати ватанӣ бештар таъмин гардид.

Бо мавриди истифода қарор гирифтани коргоҳ 46 нафар сокини маҳаллӣ бо кори доимӣ таъмин гардида, музди миёнаи меҳнати онҳо 3000 сомониро ташкил медиҳад. Ин иқдом дар баробари рушди истеҳсолот ба беҳтар гардидани сатҳи зиндагии аҳолӣ ва таъсиси ҷойҳои нави корӣ низ мусоидат хоҳад кард.

Пешвои миллат муҳтарам Эмомалӣ Раҳмон аз сатҳу сифати корҳои анҷомёфта, истифодаи таҷҳизоти муосир ва саҳми соҳибкорон дар рушди саноати мамлакат изҳори қаноатмандӣ намуда, ба фаъолияти онҳо баҳои баланд доданд.

Ҳамзамон, корхона дорои сехи нави механикӣ мебошад, ки барои эҳтиёҷоти худи корхона бунёд шудааст. Ин сех барои таъмиру нигоҳдорӣ ва хизматрасонии техникии таҷҳизоти истеҳсолӣ пешбинӣ шудааст. Дар ин ҷо корҳои таъмири таҷҳизот, омода намудани қисмҳои эҳтиётӣ, кафшергарӣ, васлкунӣ ва дигар корҳои механикӣ анҷом дода мешаванд.

Масъулон таъкид намуданд, ки ба истифода додани сехи механикӣ сифати хизматрасонии техникиро беҳтар намуда, боиси кӯтоҳ гардидани муҳлати таъмири таҷҳизотр, коҳиши хароҷоти истеҳсолӣ ва афзудани самаранокии фаъолияти корхона мегардад.

Ҳамчунин, Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон аз намоиши маҳсулоти корхонаҳои саноатии ноҳияи Бобоҷон Ғафуров боздид намуданд.

Дар намоишгоҳ маҳсулоти гуногуни истеҳсоли ватанӣ, ки маҳсули фаъолияти корхонаҳои саноатии ноҳия мебошанд, ба маъраз гузошта шуд. Аз ҷумла, навъҳои гуногуни орд ва маҳсулоти ордӣ, макарон, равғани растанӣ, маҳсулоти парандапарварӣ, тухми мурғ, хӯроки омехтаи чорво, масолеҳи сохтмонӣ ва дигар маҳсулоти истеҳсолӣ пешниҳод гардид.

Иттилоъ дода шуд, ки солҳои охир дар ноҳияи Бобоҷон Ғафуров бо дастгирии Ҳукумати Ҷумҳурии Тоҷикистон ва дар доираи сиёсати саноатикунонии босуръати кишвар шумораи корхонаҳои истеҳсолӣ афзоиш ёфта, ҳаҷми истеҳсоли маҳсулоти саноатӣ пайваста зиёд мегардад. Корхонаҳои ноҳия бо истифода аз ашёи хоми маҳаллӣ истеҳсоли маҳсулоти рақобатпазирро ба роҳ монда, дар баробари таъмини бозори дохилӣ, барои содироти маҳсулот низ имкониятҳои мусоид фароҳам овардаанд.

Зимни боздид Пешвои миллат бо намуд ва сифати маҳсулоти истеҳсолшаванда шинос шуда, ба иқдомҳои соҳибкорону истеҳсолкунандагон дар самти коркарди ашёи хоми ватанӣ, истеҳсоли маҳсулоти ивазкунандаи воридот ва таъсиси ҷойҳои нави корӣ баҳои баланд доданд.

Бо тавсия ва маслиҳатҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, соҳибкор уҳдадорӣ гирифт, ки аз ҳисоби даромадҳои ширкат як муассисаи таҳсилоти миёнаи умумии замонавӣ барои 2500 хонанда дар ду баст бунёд намояд.

Сарвари давлат муҳтарам Эмомалӣ Раҳмон таъкид намуданд, ки рушди истеҳсолоти ватанӣ, коркарди ашёи хоми маҳаллӣ, таъсиси ҷойҳои нави корӣ, истеҳсоли маҳсулоти рақобатпазир ва зиёд намудани ҳаҷми содирот аз самтҳои муҳими сиёсати иқтисодии давлат ба ҳисоб меравад.

Дар ин замина ба соҳибкорон ҷиҳати истифодаи пурраи иқтидорҳои истеҳсолӣ, баланд бардоштани сифати маҳсулот мутобиқ ба стандартҳои байналмилалӣ васеъ намудани ҳаҷми истеҳсолот, ҷалби мутахассисони соҳибтахассус ва саҳмгузории бештар дар татбиқи ҳадафҳои стратегии давлат дастуру тавсияҳои судманд доданд.