Имрӯз дар толори Кумитаи кор бо ҷавонон ва варзиши назди Ҳукумати Ҷумҳурии Тоҷикистон конференсияи илмӣ-амалӣ таҳти унвони “Иқтисоди сабз, рақамикунонӣ ва инноватсия - аз ҳадафҳои афзалиятнок барои рушди Ҷумҳурии Тоҷикистон” доир шуд.

Бино ба иттилои маркази таҳлил ва иттилооти Кумитаи кор бо ҷавонон ва варзиш, дар кори конференсия Зулфиқор Гулаҳмадзода, раиси Кумитаи кор бо ҷавонон ва варзиш, раиси Иттифоқи ҷавонони Тоҷикистон, Мирали Бодуршозода, муовини аввали директори Агентии инноватсия ва технологияҳои рақамии назди Президенти Ҷумҳурии Тоҷикистон, Фурқат Бозоров, сардори Раёсати алоқа ва иттилооти Хадамоти алоқаи назди Ҳукумати Ҷумҳурии Тоҷикистон, Шариф Раҳимзода, коршиноси масоили иқтисодӣ, намояндаи Академияи миллии илмҳои Тоҷикистон, Маҷидзода Тоҳир, муовини аввали ректори Донишгоҳи техникии Тоҷикистон ба номи М. Осимӣ, Раҳмонзода Зоир Файзалӣ, ректори Донишгоҳи технологии Тоҷикистон, инчунин намояндагони вазорату идораҳо, муассисаҳои илмӣ-таҳқиқотӣ, муассисаҳои таҳсилоти олӣ ва созмонҳои ҷамъиятӣ иштирок намуданд.

Конференсия бо сухани ифтитоҳии Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон оғоз шуд. Таъкид гардид, ки рушди иқтисоди сабз, густариши равандҳои рақамикунонӣ ва таҳкими иқтидори инноватсионӣ аз самтҳои муҳими сиёсати давлат ба ҳисоб рафта, барои ноил шудан ба ҳадафҳои стратегии миллӣ, аз ҷумла саноатикунонии босуръат ва рушди устувор заминаи асосӣ мегузоранд.

Тибқи иттилоъ, дар ҷараёни чорабинӣ маърузаҳои илмӣ ва таҳқиқоти муосир оид ба ҳифзи муҳити зист, истифодаи оқилонаи захираҳои табиӣ, такмили инфрасохтори рақамӣ, рушди идоракунии электронӣ, ҷалби сармояи дохиливу хориҷӣ ва омодасозии мутахассисони баландихтисос пешниҳод гардиданд.

Ҳамчунин, иштирокчиён дар муҳити ҳамкории илмӣ мубодилаи афкор намуда, пешниҳод ва тавсияҳои мушаххасро ҷиҳати такмили заминаи меъёриву ҳуқуқӣ, тавсеаи ҳамкориҳои байналмилалӣ, таҳкими иқтидори илмӣ-техникӣ ва густариши раванди рақамикунонии кишвар ироа карданд.

Дар анҷом бо қаноатмандӣ изҳор гардид, ки татбиқи тавсияҳои қабулшуда ба рушди устувори иқтисоди миллӣ, баланд шудани рақобатпазирии истеҳсолот, ташаккули муҳити инноватсионӣ ва тақвияти мавқеи Ҷумҳурии Тоҷикистон дар фазои иқтисодии байналмилалӣ мусоидат хоҳад кард.

“ҶТ”