Донишгоҳи аграрии Тоҷикистон ба номи Шириншоҳ Шоҳтемур бо 135 ташкилоту муассисаҳои олии хориҷи кишвар шартномаи ҳамкорӣ дошта, дар шашмоҳаи аввали соли ҷорӣ 9 созишномаи нави ҳамкорӣ ба имзо расонидааст.

Дар ин бора имрӯз - 23 июл Маҳмадзода Усмон Маъмур, ректори Донишгоҳ зимни нишасти матбуотӣ хабар дод.

Ба гуфтаи ректор амалишивии ин шартномаҳо 5 солро дар бар гирифта, ба рушди Донишгоҳ дар самтҳои алоҳида кумак мерасонад.

Зимни нишаст инчунин гуфта шуд, ки дар баробари тавсеа ёфтани муносибатҳои байналмилалии Донишгоҳ иштироки донишҷӯёну аспирантон ва докторантони ин муассиса дар озмуну намоишгоҳҳои байналмилалӣ ба маротиб бештар шудааст.

Тавре Маҳмадзода Усмон изҳор дошт, худи ҳамин моҳ дар шаҳри Сеули Ҷумҳурии Корея маросими қадрдонии ҷоизадорони 18- умин Намоишгоҳи байналмилалии ихтироооти занҳои ихтироъкор “KiWiE” доир карда шуд, ки дар он як докторанти Донишгоҳ аз рӯйи ихтисоси ботоника ва экология ғолиб дониста шуд. Дар ин намоишгоҳ 445 ихтирои занҳои ихтироъкор аз 15 давлати ҷаҳон пешниҳод гардида буд.

Уғулой ҚУТБИДДИНЗОДА, “ҶТ”