Маросими ҷамъбастии даври сеюми Озмуни ҷумҳуриявии “Тараннуми Ватан” бахшида ба 34-умин солгарди Истиқлоли давлатии Ҷумҳурии Тоҷикистон ва Рӯзи забони давлатӣ 3 октябр дар Кохи Суруши шаҳри Душанбе баргузор мегардад.

Дар ин маросим ғолибони ҷойҳои 1-ум, 2-юм ва 3-юми ҳарду номинатсияи синнусолӣ ва ғолибони ҷойҳои ифтихорӣ бо туҳфаҳо ва ҷоизапулиҳо қадр карда мешаванд.

Дар даври сеюми Озмуни ҷумҳуриявии “Тараннуми Ватан” бо фарқ аз давраҳои дигари Озмун бо ташаббуси роҳбарияти Кумитаи кор бо ҷавонон ва варзиши назди Ҳукумати кишвар тамоми иштирокчиён қадрдонӣ карда мешаванд. Иштирокчиёне, ки давоми баргузории озмун холҳои созоворро соҳиб нашуда буданд, дар шаҳру ноҳияҳо аз ҷониби бахшҳои маҳаллии Кумита ва мақомоти иҷроияи ҳокимияти давлатии вилоят ва шаҳру ноҳияҳо танҳо барои иштирок ва саҳмгузорӣ дар боло бурдани ҳисси ватандӯстии ҷавонон қадрдонӣ карда мешаванд.

Лозим ба ёдоварист, ки даври сеюми Озмуни ҷумҳуриявии “Тараннуми Ватан” бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба 34-умин солгарди Истиқлоли давлатӣ аз 10 июн то 31 августи соли ҷорӣ тариқи гурӯҳи фейсбукии рӯзномаи “Ҷавонони Тоҷикистон” баргузор гардида, садҳо ҳазор корбарони шабакаҳои иҷтимоиро фаро гирифт.