Дар доираи ҳамкориҳои байналмилалӣ ва табодули академӣ миёни Донишгоҳи давлатии тиҷорати Тоҷикистон ва донишгоҳҳои хориҷи кишвар, давоми шаш моҳи аввали соли 2025 12 нафар омӯзгору корманди Донишгоҳ бо истифода аз лоиҳаву барномаҳои гуногун ба донишгоҳҳо хориҷӣ барои гузаронидани машғулиятҳо сафарбар карда шуд.

Дар ин хусус ректори Донишгоҳи давлатии тиҷорати Тоҷикистон дар нишасти матбуотии 24 июл ба хабарнигорон иттилоъ дод.

Гуфта шуд, ки дар доираи лоиҳаи “CircuIEC” ҳайати профессорону устодони ДДТТ, ки дар донишгоҳҳои Неапол (Италия), Билефелд (Олмон) ва Сантяго-де-Компостела (Испания) дар тренингу семинарҳои омӯзишӣ иштирок карданд, ба таҳияи фанҳои нави таълимӣ шуруъ намуданд. Дониш ва маводҳои бадастомада асоси фанҳои нави иқтисодиёти даврӣ, иқтисодиёти сабз ва моделҳои тиҷорати давриро устувор гардонидааст.

Ҳамчунин таъкид гардид, ки якчанд фанҳои тадрисшавандаи ДДТТ, аз ҷумла Асосҳои менеҷмент, Иқтисодиёти корхона ва Асосҳои соҳибкорӣ аз нуқтаи назари иқтисодиёти даврӣ аз нав таҳия ва дар ояндаи наздик аз ҷониби коршиносони донишгоҳҳои шарики аврупоӣ арзёбӣ шуда, баъдан аз соли таҳсили 2025-2026 дар раванди таълимии ДДТТ ҷорӣ карда хоҳанд шуд.

Шаҳло ЭШОНОВА, “ҶТ”