Ин навбат низ даъвати навбатии ҷавонписарон ба сафи Қувваҳои Мусаллаҳи Ҷумҳурии Тоҷикистон дар ВМКБ чун анъана дар рӯзи аввал 101 фоиз иҷро гардид.

Ба ин муносибат дар Боғи фарҳангию фароғатии шаҳри Хоруғ ҷамъомади тантанавӣ доир шуд.

Маросими гусели наваскарон ба хизмати Модар - Ватан бо баргузории роҳпаймоии оммавӣ аз майдони Исмоили Сомонӣ то Боғи фарҳангию фароғатии шаҳри Хоруғ оғоз ёфт.

Дар қисмати расмӣ муовини аввали раиси ВМКБ Сафарзода Шарифхон Нураҳмад сокинони вилоятро бо иҷрои нақшаи даъват табрик кард.

Зикр гардид, ки маротибаи ҳаштум ВМКБ анъанаи неки иҷрои нақшаро дар рӯзи аввали даъват идома дода истодааст, ки боиси ифтихор ва сарбаландӣ буда, аз ҷониби ҷомеаи кишвар ва алалхусус, Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон , Сарфармондеҳи Олии Қувваҳои Мусаллаҳи мамлакат, генерали Артиш муҳтарам Эмомалӣ Раҳмон баҳои сазовор дода мешавад.

Ин баҳо ва боварии халқу Роҳбарияти Олии кишвар моро руҳбаланд ва водор ба он менамояд, ки минбаъд фаъолияти худро дар самти омодагии дифои ҳарбӣ ва амниятии Ватан боз ҳам тақвият бахшида, баҳри таҳкими иқтидори мудофиавии давлат тадбирҳои муассир андешем.

Таъкид шуд, ки Қувваҳои Мусаллаҳ ва умуман неруҳои қудратию низомӣ ва амниятии кишвар, ки зодаи замони соҳибистиқлолии мамлакат мебошанд, бо дастуру ҳидоят ва заҳматҳои бевоситаи Пешвои миллат, Ҷаноби Олӣ муҳтарам Эмомалӣ Раҳмон таъсису ташаккул ёфта, масири басо мураккаби таърихиро тай намуданд.

Дар зимн бо хитоб ба навдаъватшудагон гуфта шуд, ки хизмат дар сафи Қувваҳои Мусаллаҳ саҳифаи наву пуршараф дар ҳаёти шумо хоҳад буд, зеро, шумо қарзи муқаддаси фарзандии худро дар назди Ватан ва халқи худ ба ҷо меоред, аз ҷониби дигар, шумо аз мактаби бузурги мардонагии он гузашта, ҳамчун шахсият ба камол мерасед.

Дар идома баъди иҷрои маросими нонгазон аз ҷониби аҳли ҳунари вилоят барномаи рангини консертӣ манзур гардида, наваскарон зери навои сурудҳои ватандӯстона ба сафи Қувваҳои Мусаллаҳ гусел карда шуданд.

Садоншо ҶАНОБИЛШОЕВ, "ҶТ"