Вакилони Маҷлиси намояндагони Маҷлиси Олии кишвар дар посух ба шикояти занон, ки мегӯянд, пас аз талоқ ва дар шароити бади иқтисодӣ бехонумон мемонанд, пешниҳод карданд, ки байни арӯсу домод ҳатман шартномаи издивоҷ ба имзо расад.

Талоши бознависии Кодекси оила дар порлумон аз моҳи ноябри соли гузашта сар шуда, тарҳи онро Кумитаи кор бо занон ва оила пешниҳод кардааст.

Соли гузашта дар ҷумҳурӣ наздики 9000 оила аз ҳам пошид, ки назар ба соли 2015 4,4 дарсад бештар аст. Бо афзоиши талоқ ҳароси занон низ бештар мешавад, ки онҳо ва фарзандонашон аз сарпаноҳ ва моликият маҳрум мемонанд. Манзил асосан моликияти падару модари домод ё худи ӯст ва ҳарчанд додгоҳ шавҳаронро баъд аз талоқ ба пардохти ёрдампулӣ маҳкум мекунанд, ҳеҷ замонате барои иҷрои чунин ҳукмҳо вуҷуд надорад. Илова бар ин, бисёре аз мардҳои тоҷик дар Русия ё кишварҳои дигар ба гунаи ғайриқонунӣ кор ё даромади худро пинҳон мекунанд ва додгоҳ наметавонад, андозаи алиментро муайян намояд.