Дар асоси Фармони Президенти Ҷумҳурии Тоҷикистон дар мамлакат маъракаи даъвати баҳории ҷавонон ба сафи Артиши миллӣ оғоз ёфта, ин чорабинии муҳими сиёсӣ дар деҳоти Чоркӯҳи шаҳри Исфара дар сатҳи баланд ҷараён гирифт.

Ба ифтихори гусели наваскарон сокинони деҳоти Чоркӯҳ роҳпаймоӣ намуда, дар гулгашти навбунёди Парчами давлатии Ҷумҳурии Тоҷикистон сарҷамъ омаданд ва дар чорабинии бошукуҳи идона ширкат варзиданд.

Гуфта шуд, ки хизмат дар сафи Қувваҳои Мусаллаҳ қарзи шаҳрвандӣ ва рисолати фарзандии мост ва ҳифзи марзу бум, дастовардҳои замони соҳибистиқлолӣ, оромиву осудагӣ натиҷаи хизматҳои шабонарӯзии сарбозону афсарони шуҷоъ маънидод карда шуд. Дар чорабинии тантанавӣ масъулин иброз доштанд, ки нақшаи даъвати баҳории ҷавонон ба сафи Артиши миллӣ дар деҳоти Чоркӯҳ иҷро гардид ва ин раванд аз ҳисси ватандӯстӣ, ифтихори миллии ҷавонон дарак медиҳад.

Ба таъкиди масъулинии деҳоти Чоркӯҳ дар замони зудтағйирёбандаи авзои ҷаҳон дӯст доштани ватан, ҳимояи марзу бум ва омода буданд ба хизмати Модар-Ватан муҳимияти бештар пайдо намуда, насли ҷавонро водор месозад, ки ба қадри ин неъматҳои беназир расанд ва ҳамеша ҳушёру зирак бошанд.

Маъракаи гусели наваскарон дар деҳоти Чоркӯҳ бо тантана ва бо иҷрои тамоми расму ойинҳои нек баргузор гардида, барномаи рангини фарҳангӣ пешниҳоди наваскарон ва волидони онҳо гардонида шуд.

Субҳиддин ҚОДИРОВ, “ҶТ”