Ҳайати Кумитаи кор бо ҷавонон ва варзиши назди Ҳукумати Ҷумҳурии Тоҷикистон зери роҳбарии раиси Кумита, Гулаҳмадзода Зулфиқор Аҳмад, аз Академияи Кумитаи миллии Олимпии Ҷумҳурии Исломии Эрон боздид ба амал оварданд.

Тибқи иттилоъ, зимни боздид ҳайат бо имкониятҳои илмӣ-таҳқиқотӣ, маркази тибби варзишӣ, толорҳои таълимӣ, толорҳои варзишӣ ва машқӣ, инчунин барномаҳои муосири тайёрии варзишгарони сатҳи ҷаҳонии Академия шинос гардиданд. Ҳамчунин, ҳайат имконият пайдо намуд аз зурхона, ки маркази асосии варзишҳои суннатии Эрон мебошад, дидан намуда, бо навъҳои гуногуни машқҳои суннатӣ ва методҳои омодагӣ ба варзишгарон шинос шавад. Ин боздид ҳамчунин имкони табодули таҷриба ва омӯзиши усулҳои анъанавии варзишии Эронро фароҳам овард.

Ҳар ду ҷониб масъалаҳои ҳамкории минбаъдаро дар самти табодули таҷриба, ташкили курсҳои омӯзишӣ барои мураббиён ва доварон, дастгирии варзишгарони умедбахш ва таҳкими робитаҳои илмӣ-таҳқиқотӣ дар соҳаи варзиш баррасӣ намуданд.

Зимни мулоқот таъкид гардид, ки таҳкими ҳамкориҳои дуҷониба миёни Тоҷикистон ва Эрон дар соҳаи варзиш на танҳо барои рушди низоми варзишӣ, балки барои тақвияти робитаҳои дӯстонаи ҳар ду кишвар аҳамияти муҳим дорад. Боздид дар фазои самимият ва ҳамкории созанда баргузор гардида, ҷонибҳо омодагии худро барои густариши ҳамкориҳои минбаъда иброз доштанд.