Шамсулло Тағоев педагог, барномасоз, ҷоизадори чандин озмунҳо ва роҳбари Маркази инноватсионии Донишгоҳи миллии Тоҷикистон (ДМТ) аст. Мактаби миёнаи рақами 9-и шаҳри Норакро хатм намудааст. Соли 2007 ба факултети механикаю математикаи ДМТ дохил шуда, соли 2012 онро хатм намудааст.

Шамсулло замони мактаб-хонӣ мехост шарқшинос шавад, вале падараш зид буд. Зеро падар орзу дошт, писараш мутахассиси соҳаи тиб ё риёзӣ шавад. Қаҳрамони мо низ хоҳиши падарро рад накарда, бештар ба хондани фанҳои риёзӣ рӯ овард. Шамсулло дар синфи 11 назди устоде аз фанни информатика давоми 5-6 моҳ дарси иловагӣ гирифт. Ӯ ҷиддӣ омодагӣ дида, дар имтиҳони дохилшавӣ ба донишгоҳ баландтарин холро ба даст овард.

Номбурда фаъолияти омӯзгории хешро аз соли 2011 ҳанӯз аз замони курси чорум будан оғоз кардааст. Ӯ дар Литсейи назди Донишгоҳи давлатии тиҷоратии Тоҷикистон аз фанни информатика ба хонандагони лаёқатманд дарс гуфта, онҳоро ба озмуну олимпиадаҳо омода мекард.

Соли 2013 Шамсулло ба ҳайси ассистент ба Донишгоҳи миллии Тоҷикистон омада, фаъ-олияти омӯзгории худро идома медиҳад.

То ба ҳол 6 китоби илмию методӣ ва зиёда аз 17 мақолаи илмии Шамсулло Тағоев аз чоп баромадааст.

Ӯ ҳамчунин барномаеро барои хонандагони синфи 11 таҳия намудааст. Барнома барои табдилдиҳии системаи ҳисоби мавқеии ҳаштӣ ва шонздаҳӣ ба системаи ҳисоби мавқеии дуӣ пешбинӣ шудааст. Барнома бисёр шавқовар буда, дар сурати бомуваффақият иҷро намудани амалҳо дар экран ҳар гуна объектҳои муайян пайдо мешавад. Натиҷаи санҷишҳо муайян намуд, ки сатҳи донишазхудкунии хонандагон бо барнома нисбати дарсҳои муқаррарӣ ба маротиб боло аст. Аз ҷониби истифодабарандагон барнома баҳои баланд гирифта, барои истифода дар дигар муассисаҳои таҳсилоти миёнаи умумии ҷумҳурӣ пешниҳод шудааст.

Шамсулло мегӯяд, ки ҳоло ҷавонон ба китоб камтар таваҷҷуҳ доранд. Бинобар ин, аз худ кардани барномаҳои таълимӣ барои онҳо каме душвор аст.

“Ман бо хонандагон кор кардам ва медонам, ки аксарият ба китоб майли камтар доранд. Бинобар ин, ба хулосае омадам, ки тариқи бозӣ барномаи таълимиро ба хонандагон бояд омӯзонд. Масалан, дар синфи 11 табдилдиҳии системаи ҳисобро хонандагон мехонанд, вале мавзӯъ барои онҳо бисёр дилгиркунанда намудор мешавад. Аммо онҳо метавонанд, тариқи бозии сохтаи мо ба содагӣ ва дилгармии зиёд ин гуна мисолҳоро ҳал намоянд”.

Барномаҳои таълимии педагогӣ барои ҷомеа ва ҷавонон нақши басо калонро мебозад. Хусусан, бозии таълимии рангпуркунӣ афзалиятҳои хеле зиёдро дорост. Масалан, тафаккур ва фарҳанги техникии омӯзгорону хонандагонро боло мебарад, самаранокии сифати таълимро меафзояд, вақти расонидани маводи таълимиро ба хонандагон сарфа мекунад, диққати хонандагонро ба дарс бештар ҷалб менамояд, қабули иттилоотро осон мегардонад, фаъолнокии доимии омӯзгор ва хонандагонро дар дарс таъмин мекунад, суръати мубодилаи иттилооти байни омӯзгор ва хонандагонро меафзояд, ҳамбастагии байни хонандагонро мустаҳкам мегардонад, аҳамияти тахтаи синфии маъмулӣ коста мегардад, аз ҷиҳати санитарию гигиенӣ ба талабот мувофиқ аст.

Айни ҳол бозӣ дар шакли китоб низ таҳия ва тасдиқ шуда, дар баъзе муассисаҳо ҳамчун дастури иловагӣ барои хонандагони синфи 11 мавриди истифода қарор гирифтааст.

Шамсулло мегӯяд, ки аз соли 2011 инҷониб бо хонандагон сарукор дорад. Дар тӯли ин солҳо мушоҳида намудааст, ки хонандагон ба китобхонӣ ва худомӯзӣ кам машғул мешаванд. Мавзӯъро танҳо барои баҳо аз бар кардаву ҷавоб медиҳанд. Ӯ гуфт, ки ҳарчанд озмунҳои ҷумҳуриявӣ рӯи кор омада, то ҷое ин мушкилро камтар карда бошанд ҳам, аммо ҳанӯз ҳам он ба пуррагӣ бартараф нашудааст.

Номбурда гуфт, ки аз шакли китобии барномаи таҳиянамудааш низ хонандагон камтар истифода мебаранд.

“Ман медонам, ки аз шакли китобии ин бозӣ низ хонандагон хеле кам истифода мебаранд. Аммо дилхоҳ намуди бозӣ, аз ҷумла бозии таҳиянамудаи банда низ, чунин вижагии хосе миёни ҷавонон дорад, ки хонандагон ба таври ихтиёрӣ ва бо завқи бисёр баланд онро истифода мебаранд”,- қайд кард ӯ.

Шамсулло нақша дорад, дар оянда барномаҳоеро рӯи кор биёрад, ки хонанда бе ёрии омӯзгор тавонад, мавзӯи дарсро ба пуррагӣ аз худ кунад.
Ӯ ҳамчунин дар озмуни “Беҳтарин педагоги ИДМ” иштирок карда, ҷойи дуюмро соҳиб шудааст.

“Дар ин озмун омӯзгорони аз 25 то 35-сола аз 12 давлати дунё иштирок карданд. Ҳарчанд медонистам, ки мақола барои имрӯз бисёр зарурӣ ва қобили таваҷҷуҳ буд, аммо боварӣ надоштам, ки аз миёни ин ҳама омӯзгор мақоми дуюмро соҳиб мешавам”, - гуфт Шамсулло Тағоев.

Имрӯзҳо чандин шогирдони Шамсулло дар озмуну олимпиадаҳои ҷумҳуриявӣ ва байналмилалӣ иштирок карда, ба гирифтани мақомҳои ифтихорӣ мушарраф гардидаанд.

Ҳошим РАҲМАТУЛЛОЕВ,“ҶТ”