Туҳфаи арзишманди “Ҷумҳурият” ба муносибати ҷашни умумимиллӣ

4 сентябр дар бинои Парлумони Тоҷикистон, ба ифтихори 35-солагии Истиқлоли давлатӣ рӯнамоии китобҳои тозанашри Нашрияи расмии Ҳукумати кишвар рӯзномаи “Ҷумҳурият” баргузор гардид. Дар ин ҳамоиш се асари нав - “Эмомалӣ Раҳмон ва эҳёи тамаддуни ориёӣ”, “Бозгашти қаҳрамон” ва “Бозгашти қаҳрамон 2” ба доираи васеи хонандагон муаррифӣ карда шуданд.

Дар чорабинӣ муовини Сарвазири Ҷумҳурии Тоҷикистон Дилрабо Мансурӣ, муовини Раиси Маҷлиси намояндагони Маҷлиси Олии Ҷумҳурии Тоҷикистон Мавсума Муинӣ, муовини Раиси шаҳри Душанбе Дилбар Одилзода, вакилони Маҷлиси намояндагон, шоирону нависандагон ва дигар намояндагони аҳли адабу фарҳанг иштирок намуданд.

Муаррифии китобҳо дар доираи таҷлили ҷашни 35-солагии Истиқлоли давлатӣ ва эълон шудани соли 2026 ҳамчун “Соли вусъат додани корҳои ободониву созандагӣ ва тақвияту таҳкими худшиносиву худогоҳии миллӣ” доир гардида, аз ҷумлаи иқдомҳое мебошад, ки ба татбиқи ҳадафҳои маънавӣ ва фарҳангии ин сол мусоидат менамояд.

Дар чорабинӣ муовини Сарвазири Ҷумҳурии Тоҷикистон Дилрабо Мансурӣ, муовини Раиси Маҷлиси намояндагони Маҷлиси Олии Ҷумҳурии Тоҷикистон Мавсума Муинӣ, муовини Раиси шаҳри Душанбе Дилбар Одилзода, раиси Иттифоқи нависандагони Тоҷикистон Низом Қосим, Шоири халқии Тоҷикистон Муҳтарам Ҳотам ва дигар намояндагони аҳли зиё суханронӣ карданд.

Аз ҷумла зикр гардид, ки нақши рӯзномаи “Ҷумҳурият” дар ҳаёти сиёсӣ, иҷтимоӣ ва фарҳангии кишвар муҳим буда, фаъолияти нашрия танҳо ба инъикоси рӯйдодҳои муҳими ҷомеа маҳдуд намешавад. Таҳия ва нашри асарҳои таърихию адабӣ ва маърифатӣ аз он шаҳодат медиҳад, ки ин рӯзнома дар баробари тарғиби сиёсати созанда ва бунёдкоронаи роҳбарияти давлат, инчунин, дар ҳифзи арзишҳои миллӣ, таҳкими худшиносӣ ва худогоҳии миллӣ, боло бурдани маърифати ҷомеа ва бедории маънавии мардум саҳми назаррас дорад.

Ҳамчунин, таъкид карда шуд, ки чунин иқдомҳо барои ошно намудани насли ҷавон бо саҳифаҳои муҳими таърихи давлатдории тоҷикон ва зиндагиномаи фарзандони барӯманди миллат аҳамияти хос доранд. Китобҳои тозанашри рӯзномаи “Ҷумҳурият” низ бо ҳамин ҳадаф ба табъ расида, метавонанд ҳамчун манбаи муҳими омӯзишӣ барои хонандагон хизмат намоянд.

Китоби “Эмомалӣ Раҳмон ва эҳёи тамаддуни ориёӣ” ба фаъолияти созанда, хизматҳои мондагор ва нақши Президенти Ҷумҳурии Тоҷикистон муҳтарам Эмомалӣ Раҳмон дар рушди давлатдории миллӣ бахшида шудааст. Дар он аз садоқату матонати Сарвари давлат дар роҳи пойдории сулҳу субот ва эҳёи таъриху тамаддуни аҷдодӣ гуфта мешавад.

Китобҳои дигар “Бозгашти қаҳрамон” ва “Бозгашти қаҳрамон 2” ба зиндагиву фаъолияти сиёсӣ ва ҷонфидоиҳову талошҳои беназири Қаҳрамонони Тоҷикистон Нусратулло Махсум ва Шириншоҳ Шоҳтемур бахшида шудаанд, ки хонандаро бо саҳифаҳои муҳими таърихи навини тоҷикон ва хизматҳои бесобиқаи ин фарзонафарзандони миллат ошно менамоянд.
Ин аст, ки ҳозирин рӯнамоии китобҳои “Эмомалӣ Раҳмон ва эҳёи тамаддуни ориёӣ”, “Бозгашти қаҳрамон” ва “Бозгашти қаҳрамон 2”-ро на танҳо як чорабинии фарҳангӣ, балки намунаи олии талошҳои матбуоти миллӣ дар самти ҳифзи хотираи таърихӣ, арҷгузорӣ ба шахсиятҳои барҷаста ва таҳкими худшиносии миллӣ арзёбӣ намуданд.

Ёдовар мешавем, ки тайи даҳ соли охир аҳли эҷоди рӯзномаи “Ҷумҳурият” ба хотири муаррифии фарҳангу тамаддуни миллӣ ва гиромидошти шахсиятҳои барҷастаи миллат 14 озмуни ҷумҳуриявию байналмилалӣ баргузор кардааст. Чунин фаъолияти нашрия нишон медиҳад, ки матбуоти даврӣ дар замони муосир танҳо воситаи расонидани иттилоъ набуда, метавонад ҳамчун василаи муҳими тарбияи ҷомеа, ҳифзи хотираи таърихӣ ва тарғиби арзишҳои миллӣ низ хизмат намояд.

Сайёраи ҚИЁМИДДИН, “ҶТ”