Зери ин унвон 22 ноябр дар НБО “Роғун” дар доираи нақшаи чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Вазорати мудофиаи Ҷумҳурии Тоҷикистон ва Донишкадаи давлатии фарҳанг ва санъати Тоҷикистон ба номи М. Турсунзода бахшида ба Рӯзи Парчами давлатии Ҷумҳурии Тоҷикистон чорабинии тантанавӣ баргузор гардид.

Дар ин бора аз маркази таҳлил ва иттилооти Кумитаи кор бо ҷавонон ва варзиш хабар доданд.

Тибқи иттилоъ, ҳадафи асосии ин иқдом таҳкими ҳисси ватандӯстӣ, ифтихори миллӣ, арҷгузорӣ ба муқаддасоти давлатдорӣ ва баланд бардоштани маърифати ҷавонон дар бораи иқдомҳои бузурги созандагӣ дар кишвар мебошад.

Дар ҷараёни сафар роҳбарият ва ҷавонон аз раванди корӣ ва марҳилаҳои сохтмони иншооти азими аср - Неругоҳи барқи обии “Роғун” боздид намуда, бо мутахассисон ва сарбозони дар ин иншоот фаъолияткунанда мулоқоти судманд анҷом доданд.

Дар раванди чорабинӣ 320 нафар сарбозоне, ки дар ин иншооти азими аср кору фаъолият намуда, саҳмашонро дар бунёди он гузошта истодаанд, бо сипоснома ва туҳфаҳои хотиравии Кумитаи кор бо ҷавонон ва варзиш қадрдонӣ гардиданд.

Дар фарҷоми чорабинӣ аз ҷониби санъаткорони Донишкадаи давлатии фарҳанг ва санъати Тоҷикистон ба номи Мирзо Турсунзода барномаи пурмуҳтавои фарҳангӣ - фароғатӣ пешкаши иштирокчиён карда шуд.

“ҶТ”