Аз 3 то 16 июли соли равон шаҳри Ҷакарта, пойтахти Индонезия, мизбони Чемпионати Осиё оид ба бокс миёни муштзанҳои то 19 ва 23-сола хоҳад буд. Ин мусобиқа яке аз муҳимтарин сабқатҳои қоравӣ дар риштаи бокс маҳсуб ёфта, беҳтарин муштзанони ҷавони Осиёро ба ҳам меорад.

Дар ин чемпионати бонуфуз Ҷумҳурии Тоҷикистонро 11 муштзан намояндагӣ мекунанд, ки дар ду гурӯҳи синнусолӣ U19 ва U23 барои ҷойҳои ифтихорӣ ва медалҳои мусобиқа мубориза хоҳанд бурд. Ҳайати мунтахаби кишвар бо омодагии ҷиддӣ вориди сабқат шуда, умед дорад дар арсаи қоравӣ натиҷаҳои арзанда ба даст оварад.

Дар гурӯҳи U19 Тоҷикистонро ҳафт муштзан намояндагӣ мекунанд. Аз миёни духтарон Фариноз Абдуллоева (54 кг) ва Зарифа Ҳасанова (57 кг) вориди рақобат мешаванд. Дар миёни писарон бошад, Аъзамҷон Ҳасанов (50 кг), Бахтовар Усмонов (55 кг), Шарифхон Нуралиев (60 кг), Муҳаммад Мамадалиев (70 кг) ва Хоҷамуминҷон Холов (80 кг) шарафи варзиши тоҷикро ҳимоя хоҳанд кард.

Дар гурӯҳи U23 чор муштзани тоҷик рақобатро идома медиҳанд. Аз байни бонувон Бибинишастамо Холова (54 кг) ва Ҳангома Исоева (60 кг) ба ринг мебароянд. Дар сабқати мардон бошад, Дамир Муйбалихонов (60 кг) ва Алишерихудо Холов (75 кг) ҳунарнамоӣ хоҳанд кард.

Роҳнамоии ҳайати мунтахаби бокси Тоҷикистон дар ин мусобиқа ба зиммаи мураббиёни соҳибтаҷриба Саидхоҷа Мамуров ва Рустам Музаффаров вогузор шудааст. Таҷриба ва маҳорати онҳо дар омодасозии варзишгарон метавонад дар роҳи ба даст овардани натиҷаҳои баланд нақши муҳим бозад. Ҳамзамон, Мансур Муҳиддинов ҳамчун довар Тоҷикистонро дар ҳайати доварони мусобиқа намояндагӣ мекунад.

Бояд гуфт, ки Чемпионати Осиё имсол хеле рақобатнок арзёбӣ мешавад. Тибқи маълумоти расмӣ, дар мусобиқа 430 варзишгар аз 26 кишвари қора иштирок мекунанд. Ин нишон медиҳад, ки ҳар як рақобат барои муштзанон имтиҳони ҷиддии маҳорат, ирода ва омодагии ҷисмонӣ хоҳад буд.

Яҳё МАҲМАДНАБИЕВ, “ҶТ”