Имрӯз, 16 феврал, вазири корҳои хориҷии Ҷумҳурии Тоҷикистон Сироҷидин Аслов ва Ҷумҳурии Исломии Афғонистон Салоҳиддин Раббонӣ бо намояндагони васоити ахбори омма мулоқот карданд.

Сироҷидин Аслов боздиди вазири Афғонистонро аз Тоҷикистон идомаи мантиқии муколамаи мунтазам ва созандаи ду кишвари дӯсту бародар хонда, иброз дошт:

-  Тоҷикистон ва Афғонистон дорои пайвандҳои ниҳоят амиқи таърихӣ ва муштаракоти иҷтимоӣ, фарҳангӣ ва маънавӣ мебошанд, ки дар зоти худ арзишҳои бузург мебошанд. Ин пайвандҳо дӯстии таърихии мардумонамонро тақвият мебахшад. Ниёзи ҳаётии кишварҳо ва минтақа субот ва амният мебошад. Дар ин замина мо дар фазои ҳусни тафоҳуми комил ва мавқеъгирии созанда доираи васеи масъалаҳои ҳамкориҳои дуҷонибаю бисёрҷонибаро баррасӣ намудем.

Ҷонибҳо зарурати таҳкими ҳамкориро дар самти мубориза бар зидди терроризми байналмилалӣ, ифротгароӣ, қочоқи маводи мухаддир ва дигар масъалаҳои амнияти минтақа ва ҷаҳон тасдиқ намуданд. Ҷониби Тоҷикистон аз сатҳи баланди ҳамкориҳои ду кишвар дар чаҳорчӯбаи созмонҳои байналмилалӣ ва минтақавӣ, аз ҷумла Созмони Милали Муттаҳид, Созмони ҳамкории иқтисодӣ ва Созмони ҳамкории исломӣ ёдовар шуд. Ҳамчунин вазири корҳои хориҷии кишвар Сироҷидин Аслов бори дигар ҷонибдории Тоҷикистонро аз узвияти комили Ҷумҳурии Исломии Афғонистон дар СҲШ иброз намуд.