Субҳи имрӯз Раиси шаҳри Душанбе муҳтарам Рустам Эмомалӣ барои иштирок дар интихоботи даъвати нави вакилони Маҷлиси намояндагони Маҷлиси Олии Ҷумҳурии Тоҷикистон ва маҷлисҳои маҳаллии вакилони халқ ба участкаи интихоботии №15, ҳавзаи интихоботии №12-и ноҳияи Исмоили Сомонии шаҳри Душанбе Барои овоздиҳӣ омаданд.

Дар ин бора саҳифаи телеграмии шаҳрдори Душанбе хабар дод.

Муҳтарам Рустам Эмомалӣ бо сокинони маҳаллаи Маҳмадулло Холови ноҳияи Исмоили Сомонии шаҳри Душанбе, ки участкаи интихоботии №15 дар ҳудуди он ҷойгир аст, дар баробари дигар сокинони Тоҷикистон бо эҳсоси баланди ватандӯстӣ ва ифтихор аз давлату давлатдорӣ иштирок намуда, овоз доданд.

Ёдовар мешавем, ки имрӯз сар аз соати 6:00 то 22:00 дар кишвар маъракаи интихоботи вакилони Маҷлиси намояндагони Маҷлиси Олии Ҷумҳурии Тоҷикистон ва маҷлисҳои маҳаллии вакилони халқ сурат мегирад.