Комиссияи маркази интихобот ва раъйпурсии Тоҷикистон натиҷаи пешакии интихоботи парлумонии Тоҷикистонро, ки дирӯз, 2-юми март баргузор шуда буд, эълон кард.

Бахтиёр Худоёрзода, раиси Комиссияи маркази интихобот ва раъйпурсии Тоҷикистон имрӯз дар Душанбе, дар ҳузури аъзои ҳизбҳои сиёсӣ, даъвогарони курсиҳои порлумонӣ, нозирони байналмилалӣ ва рӯзноманигорон натиҷаи интихоботро эълон кард.

Мувофиқи иттилои номбурда аз 5 522 038 нафар шаҳрвандони кишвар, ки ҳуқуқи дар интихобот иштирок карданро доштанд, 4 712 967 нафар ё худ 85,3 фоизи онҳо дар маъракаи интихоботӣ иштирок карданд.

Ҳизби халқии демократии Тоҷикистон бо ба даст овардани 2 435 541 овоз ё худ 51,9 фоизи овозҳо соҳиби 12 мансаби вакилӣ шуд.

Ҳизби аграрии Тоҷикистон 986 887 ё худ 21 фоиз овозҳоро ба даст оварда соҳиби 5 мансаби вакилӣ гардид.

Ҳизби демократии Тоҷикистон 237 563 ё худ 5,1 фоизи овозҳо соҳиби 1 мансаби вакилӣ шуд.

Ҳизби ислоҳоти иқтисодии Тоҷикистон 595 281 ё 12,3 фоизи овозҳоро ба даст оварда, соҳиби 3 мансаби вакилӣ гардид.

Ҳизби сотсиалистии Тоҷикистон 248 064 ё 5,3 фоизи овозҳоро ба даст овард ва соҳиби 1 мансаби вакилӣ шуд.

Ҳизби коммунистии Тоҷикистон 89 538 ё 1,9 фоизи овозҳоро ба даст оварда, бинобар сабаби камтар аз 5 фоизи овозҳоро ба даст овардан аз гирифтани мансаби вакилӣ маҳрум шуд.

Ҳошим РАҲМАТУЛЛОЕВ, “ҶТ”