То 1 январи соли 2026 дар мақомоти давлатӣ ва мақомоти худидоракунии шаҳрак ва деҳот шумораи умумии воҳидҳои корӣ 22 ҳазору 817 ададро ташкил додааст, ки нисбат ба ҳамин давраи соли гузашта 440 воҳид зиёд шудааст.

Ин нуктаро Абудллозода Фирдавс, муовини аввали директори Агентии хизмати давлатии назди Президент Ҷумҳурии Тоҷикистон имрӯз - 26 январи соли ҷорӣ зимни нишасти хабарии ин ниҳод иброз намуд.

Номбурда сабабҳои зиёд шудани воҳидҳои кориро таъсиси мақомоти нав, таҷдиди сохтор ва афзудани воҳидҳои корӣ дар бархе аз вазорату идораҳо арзёбӣ намуд.

Ҳамчунин, гуфта шуд, ки дар ин давра барои ишғоли 11 ҳазору 922 мансаби холии маъмурии хизмати давлатӣ озмун эълон гардида, дар маҷмуъ 6117 нафар довталаб барои ишғоли мансабҳои холии маъмурии хизмати давлатӣ тавсия дода шуданд. Аз ин шумора 2015 нафар довталаб бо сабаби иштирок накардан дар санҷишҳои пешакӣ (диктант) ва суҳбат, ҷавобгӯ набудан ба талаботҳои тахассусӣ аз озмун нагузашта ҳисобида шуданд.

Қайд гардид,ки аз шумораи 4102 нафари ба мансабҳо таъингардида 2470 нафар ҷавонони то 35-сола мебошанд.

Таъкид гардид, ки шумораи ҷавонони то 35-сола дар хизмати давлатӣ то имрӯз 9429 нафар ё 50,1 фоизро ташкил дода, дар мансабҳои роҳбарикунанда 1790 нафар ё 28,9 фоиз ҷавонон фаъолият доранд, ки нисбат ба ҳамин давраи соли 2025 мутаносибан зиёд мебошад.

Шаҳло ЭШОНОВА, “ҶТ”