Фаррух Каримзода, магистранти Донишгоҳи давлатии Хуҷанд ба номи академик Бобоҷон Ғафуров дар Олимпиадаи 6-уми кушоди математикии донишҷӯёни мактабҳои олии ҷаҳон соҳиби медали тилло гардид.

Дар ин хусус аз маркази матбуотии Вазорати маориф ва илми Ҷумҳурии Тоҷикистон хабар доданд.

Тибқи иттилоъ, ин аввалин дастоварди магистрантони тоҷик аз Олимпиадаи мазкур ба ҳисоб меравад.

Олимпиадаи мазкур - “OMOUS-2026” аз 23 то 28 март дар шаҳри Ашқободи Туркманистон баргузор гардида, дар он 547 нафар аз 72 донишгоҳ ва 10 давлати ҷаҳон иштирок намуданд.

Дар категорияи А (математикҳои касбӣ) Фаррух Каримзода бо намояндагони донишгоҳҳои бонуфузи ҷаҳон рақобат намуда, маҳорати баланди зеҳнӣ нишон дод.

Гуфта мешавад, ки Фаррух Каримзода дар омода намудани хонандагон ба олимпиадаҳои байналмилалӣ ҳам саҳми худро дошта, ба насли наврас кумак мерасонад.

Шаҳноза АЗИМОВА, “ҶТ”