Зарина Яминова то имрӯз дар соҳаи нассоҷӣ чандин ихтироъ намудааст. Ӯ 28 октябри соли 1985 таваллуд шуда, хатмкардаи Донишгоҳи технологии Тоҷикистон (2008) мебошад. Айни ҳол омӯзгор, корманди илмии донишгоҳи мазкур аст.

Зарина соҳиби 4 патенти ихтироъ, 2 патенти Авруосиё (ҷавоби мусбат), 20 мақолаи илмӣ, ки дар дохили кишвар, Австрия, Чехия, Қазоқистон, Руссия ба нашр расидаанд, мебошад. Ихтирооташ солҳои 2012 ва 2014 дар комбинати “Нассоҷии тоҷик” татбиқ шуда, соҳиби 4 санади татбиқӣ аст. Рисолаи номзадии худро дар мавзӯи “Коркарди партовҳои абрешимӣ” имсол ҳимоя карданист.

Соли 2016 дар озмуни ихтироъкорони занҳои ҷаҳон “KIWIE-2016”, ки дар Кореяи Ҷанубӣ бо иштироки 400 нафар аз 25 давлати дунё гузашт, соҳиби медали нуқра гашт. Дорандаи Дипломи дараҷаи 1-и Вазорати маориф ва илми кишвар байни ихтироъкорони ҷавони ҷумҳурӣ “Навовари беҳтарин-2014”, Дипломи Маркази миллии патенту иттилооти Вазорати рушди иқтисод ва савдо барои иштирок дар намоишгоҳи аввалини ихтироъкорони ҷумҳурӣ “Аз ихтироъ ба инноватсия-2014” аст.

– Мақсади мо баланд бардоштану самаранок истифодабарии партовҳои абрешимӣ бо роҳи ҳосил намудани ресмони муштарак аз пахтаю абрешим, тайёр кардани ширеш барои оҳаркунии ресмонҳо ва омӯхтани хусусиятҳои физикию кимиёвии ширеше, ки аз партовҳои абрешимӣ ҳосил кардем, мебошад, - мегӯяд Зарина Яминова.  

Чор ихтироеро, ки Зарина анҷом додаасту дорои патент гардидаанд, инҳоянд:

1. Тарзи ҳосил намудани оҳар барои нахи пахтагин аз партовҳои абрешим;
2. Тарзи ҳосил кардани нахи муштарак аз пахтаю партовҳои абрешим;
3. Тарзи ҳосил намудани хокаи серитсин аз партовҳои абрешим;
4. Тарзи ҳосил намудани оҳар аз маҳлули серитсин ва карбоксилметилселюлоза.

Ӯ натиҷаи корҳои худро хулосабарорӣ карда мегӯяд, ки 10 соли охир дар соҳаи абрешими Ҷумҳурии Тоҷикистон пастшавии истеҳсоли пилла 1,5 баробар, абрешими хом 1,4 баробар ва истеҳсоли матои абрешимӣ қариб 10 баробар паст шудааст. Ғайр аз ин, пастшавии сифати пилла дар нуқтаҳои тайёркунии он дида мешавад. Ҳамагӣ 10 %-и пилла дорои сифати навъи аввал мебошад, боқимондааш навъҳои 2 ва 3. Ҳамин тавр, дар коркарди ин гуна пиллаҳо миқдори партовҳои абрешимӣ низ дар фабрикаҳои коркарди пилла зиёд мешаванд.

Беҳрӯз ХОЛМУРОДОВ, “ҶТ”