Дар нимсолаи якуми соли 2026 дар Донишгоҳи давлатии омӯзгории Тоҷикистон ба номи Садриддин Айнӣ 4 шурои нави диссертатсионӣ ба фаъолият оғоз намуд. Дар ин хусус имрӯз - 23 июл, Аҳлиддин Ибодуллозода, ректори Донишгоҳ зимни нишасти хабарӣ иттилоъ дода, афзуд, ки бо таъсиси ин шуроҳо шумораи умумии шуроҳои диссертатсионии Донишгоҳ ба 8 адад расид.

Ба гуфтаи ректори Донишгоҳ, шуроҳои нави диссертатсионӣ аз рӯйи ихтисосҳои таърих, забон, химия ва география таъсис ёфта, барои омода намудани кадрҳои баландихтисоси илмӣ ва рушди таҳқиқоти илмӣ дар ин самтҳо заминаи мусоид фароҳам меоранд.

Инчунин, Аҳлиддин Ибодуллозода иттилоъ дод, ки айни замон дар Донишгоҳ барои таъсиси боз ду шурои нави диссертатсионӣ аз рӯйи ихтисосҳои фалсафа ва методикаи таълими забон ва адабиёт корҳои омодагӣ идома доранд. Бо таъсиси ин шуроҳо имкониятҳои Донишгоҳ дар самти тайёр намудани докторони фалсафа (PhD) ва докторони илм боз ҳам васеъ хоҳанд шуд.

Шаҳноза АЗИМОВА, “ҶТ”