Дар Академияи идоракунии давлатии назди Президенти Ҷумҳурии Тоҷикистон омодасозии мутахассисон аз рӯйи 31 ихтисос ба роҳ монда шудааст, ки нисбат ба ҳамин давраи соли гузашта 6 ихтисос зиёд мебошад.

Дар ин бора 6 июл Даврон Сафарзода, ректори Академияи мазкур зимни нишасти хабарӣ иттилоъ дод.

Зикр гардид, дар шаш моҳи аввали соли 2026 шумораи умумии донишҷӯён, магистрантон ва докторантони PhD-и Академия ба 5604 нафар расидааст. Ин нишондиҳанда нисбат ба ҳамин давраи соли таҳсили 2024 -2025, 511 нафар ё 10% зиёд мебошад.

Ба гуфти ректор афзоиши шумораи донишҷӯён ва муҳаққиқон аз боло рафтани нуфузу эътибори муассиса, тавсеаи имкониятҳои таҳсил ва афзоиши талабот ба ихтисосҳои пешниҳодшаванда шаҳодат медиҳад.

Дар идома иброз гардид, ки дар давраи ҳисоботӣ аз ҳамаи зинаҳои таҳсилоти Академия 1395 нафар хатм намуда, аз ин шумора 85 нафар соҳиби дипломи аъло гардидаанд.

М. МУҚАДДАМОВА, “ҶТ”