Соли 2025 аз сӯйи Академияи идоракунии давлатии назди Президенти Ҷумҳурии Тоҷикистон барои таҳсил ба муассисаҳои таҳсилоти олии касбии кишварҳои хориҷӣ 40 нафар донишҷӯ сафарбар шудаанд.

Дар ин бора 26 январ Даврон Сафарзода, ректори Академия зимни нишасти хабарӣ иттилоъ дод.

Гуфта шуд, ки аз ин шумора 12 нафар дар Қазоқистон, 18 нафар дар Русия ва 10 нафар дар Ҷумҳурии Мардумии Чин таҳсил мекунанд.

Ҳамчунин зикр гардид, ки Академия барои ҳуҷҷатсупории 14 нафар хатмкардагони зинаи бакалавриат ҷиҳати дохил шудан ба барномаҳои магистрии МТОК- ҳои Русия, Чин, Британияи Кабир, Туркия ва Кореяи Ҷанубӣ мусоидат намудааст.

- Дар Академияи идоракунии давлатии назди Президенти Ҷумҳурии Тоҷикистон ҳоло 3 нафар шаҳрванди хориҷӣ, аз кишварҳои Эрон, Узбакистон ва Қазоқистон таҳсил карда истодаанд, - гуфт Даврон Сафарзода.

С. ҚИЁМИДДИН, “ҶТ”