Мактабу маориф дар роҳи рушду нумӯи иҷтимоию иқтисодӣ ва зеҳнии ҳар як миллат мавқеи хос дорад. Боиси хурсандии мо – омӯзгорон аст, ки дар давоми 29 - соли истиқлол ҷиҳати рушди соҳаи маориф аз тарафи Ҳукумати кишвар таваҷҷуҳи махсус зоҳир гардида, дар натиҷа соҳаи мазкур ба нишондиҳандаҳои муайян ноил гардид.

Солҳои охир Ҳукумати кишвар бо истифодаи ҳамаи имкониятҳо, аз ҷумла бо ҷалби соҳибкорону шахсони ҳимматбаланд иншоотҳои гуногуни соҳаи маорифро бунёд намуда, ҳамзамон ҷиҳати фароҳам овардани шароитҳои муосир барои маорифчиёни мамлакат тадбирҳои судмандро роҳандозӣ намуда истодааст. Албатта, ин бесабаб нест. Сарвари давлат имрӯз ба соҳаи маориф ва ба мактабу омӯзгор бештар афзалият медиҳанд, то насли имрӯза соҳибмаърифат ба воя расаду соҳиби касбу ҳунар гардад.

Имрӯз масъалаи баланд бардоштани ҳисси худшиносии миллӣ, ватандӯстиву ифтихори ватандорӣ ва дар рӯҳияи инсонпарварӣ тарбия намудани насли навраси кишвар яке аз масъалаҳои муҳим ба шумор меравад, ки ҳалли он дар навбати аввал маҳз ба омӯзгорон алоқамандии зич дорад. Ҳамин аст, ки Пешвои миллат муҳтарам Эмомалӣ Раҳмон барои боз ҳам баланд бардоштани нақшу манзалати омӯзгор дар ҷомеа пайваста таваҷҷуҳ зоҳир менамоянд.

Сарвари кишвар муҳтарам Эмомалӣ Раҳмон дар яке аз суханрониҳояшон гуфта буданд: “Пешаи омӯзгорӣ муқаддастарин касби рӯйи олам аст. Бедории фикрӣ, покизагии ахлоқ ва ташаккули ақлонии инсон маҳсули ранҷу машаққати омӯзгорон мебошад”.

Имрӯзҳо вобаста ба пешрафти ҷомеа масъулияти омӯзгорон дучанд мегардад. Бешубҳа, танҳо миллати босавод метавонад, ки насли соҳибмаърифату донишманд ва кадрҳои арзандаи давронро ба воя расонад ва дар ин росто нақши омӯзгор бениҳоят бузург аст.

Хулоса, дар хуб ба камол расидани аҳли ҷомеа омӯзгор нақши муҳим дошта, бояд ҳар як нафар аз таълиму тадриси омӯзгор сабақи одамият гираду бо аз бар кардани донишу илму ҳунар саҳми худро дар рушди меҳан гузорад.

Ойҷонбӣ НАЗАРОВА,
омӯзгори Коллеҷи тарбияи ҷисмонии Тоҷикистон