Дар нимсолаи якуми соли 2026 ба Агентии назорат дар соҳаи маориф ва илми назди Президенти Ҷумҳурии Тоҷикистон ҳамагӣ 456 муроҷиат ворид шудааст. Аз ин шумора 417 муроҷиат аз шахсони воқеӣ оид ба эътироф ва муайян намудани баробарарзишии ҳуҷҷатҳои таҳсилоти давлатҳои хориҷӣ ва 39 муроҷиат аз шахсони ҳуқуқӣ мебошад.

Дар ин бора Муҳаммадтоир Саидзода, директори Агентии мазкур 14 июл зимни нишасти хабарӣ иттилоъ дод.

Ба гуфтаи ӯ, ин нишондиҳанда нисбат ба ҳамин давраи соли 2025 183 муроҷиат бештар аст. Дар натиҷаи ташхиси ҳуҷҷатҳои таҳсилоти давлатҳои хориҷӣ, ки барои эътироф ва муайян намудани баробарарзишӣ пешниҳод шудаанд, 15 ҳуҷҷати қалбакӣ ошкор гардидааст. Аз ҷумла, 2 ҳуҷҷат ба ихтисосҳои тиббӣ дар зинаи таҳсилоти мутахассис, 10 ҳуҷҷат дар зинаи бакалавр аз рӯи ихтисосҳои гуногун, 1 ҳуҷҷат дар зинаи таҳсилоти миёнаи касбӣ ва 2 ҳуҷҷат дар зинаи таҳсилоти умумӣ муайян карда шудааст.

Ҳамчунин, иттилоъ дода шуд, ки дар давраи ҳисоботӣ аз 611 муассисаи таълимии аз аттестатсияи давлатӣ гузашта, 36 муассиса бинобар сабаби пурра ба талаботи меъёрӣ мутобиқат накардан аз аттестатсияи давлатӣ шартан гузаронида шуданд. Ба ин шумора 6 муассисаи таҳсилоти томактабӣ, 23 муассисаи таҳсилоти умумӣ, 4 муассисаи таҳсилоти иловагӣ, 2 муассисаи таҳсилоти ибтидоии касбӣ ва 1 муассисаи таҳсилоти олии касбӣ дохил мешаванд. Ба гуфтаи масъулон, ба ин муассисаҳо иҷозатнома бо муҳлати номаҳдуди амал дода шуда, баргузории аттестатсияи такрории онҳо дар давоми ду соли оянда пешбинӣ шудааст.

М. МУҚАДДАМОВА, “ҶТ”