Бо мақсади таъмини арзёбии саривақтӣ ва сифатноки даромаду хароҷоти буҷети давлатӣ, истифодаи мақсаднок ва самараноки маблағҳои буҷетӣ ва воситаҳои давлатӣ Палатаи ҳисоб дар вазорату идораҳо, марказ ва гурӯҳҳои татбиқи лоиҳаҳои сармоягузорӣ, бонкҳо, субъектҳои хоҷагидорӣ ва дигар муассисаҳо 188 чорабинии аудиторӣ гузаронд.

Дар натиҷаи ин санҷишҳо қоидавайронкуниҳои низоми молиявӣ ба маблағи умумии 710,6 миллион сомонӣ вобаста ба ташаккул ва иҷрои буҷети давлатӣ ошкор гардидааст. Ҳамчунин, дар самти пешбурди баҳисобгирии муҳосибӣ ва ҳисоботи молиявӣ 352,6 миллион сомонӣ, дар идоракунии моликияти давлатӣ 14,8 миллион сомонӣ, дар соҳаи сохтмон 37,5 миллион сомонӣ ва дигар қоидавайронкуниҳо ба маблағи 1,1 миллион сомонӣ муайян карда шуданд.

Дар ин бора имрӯз - 11 феврал Ҷамшед Каримзода, раиси Палатаи ҳисоби Ҷумҳурии Тоҷикистон зимни нишасти матбуотӣ иттилоъ дод.

Ба гуфтаи ӯ, ҷиҳати бартараф намудани камбудию норасоиҳои ошкоршуда чораҳои мушаххас андешида шудаанд. Аз ҷумла, ба суратҳисоби "Маблағҳои зарурӣ, камомад ва тасарруф" дар КВД "Амонатбонк" 110,7 миллион сомонӣ, ба суратҳисобҳои Вазорати молия 40,5 миллион сомонӣ ва дар маҷмуъ 151,2 миллион миллион сомонӣ барқарор гардидааст, ки нисбат ба соли қаблӣ 72,5 миллион сомонӣ зиёд мебошад.

Илова бар ин, ба дигар суратҳисобҳо 297,2 миллион сомонӣ барқарор карда шуда, дар маҷмуъ барқарорсозии маблағҳо 67,7 фоизи ҳаҷми умумии қоидавайронкуниҳои молиявиро ташкил медиҳад.

Малика МУҚАДДАМОВА, “ҶТ”