Дар соли 2025 аз ҷониби мутахассисони Хадамоти назорати давлатии санитарию эпидемиологӣ ва марказҳои назорати давлатии санитарию эпидемиологии вилоят ва шаҳру ноҳияҳои кишвар ҳамагӣ 7700 санҷиши санитарии ҷорӣ ва эпидемиологӣ дар иншоотҳои гуногун гузаронида шудааст. Дар соли 2024 ин нишондиҳанда 16 ҳазору 887 санҷишро ташкил медод.

Дар ин бора Абдуллозода Ҷамолиддин, вазири тандурустӣ ва ҳифзи иҷтимоии аҳолии Ҷумҳурии Тоҷикистон, зимни нишасти матбуотӣ иттилоъ дод.

Ба гуфтаи вазир, санҷишҳои ғайринақшавӣ асосан дар асоси супоришҳои протоколии мақомоти иҷроияи маҳаллии ҳокимияти давлатӣ дар вилоятҳо ва шаҳру ноҳияҳо, инчунин бо дархосту супоришҳои мақомоти қудратӣ анҷом дода шудаанд. Ҳадафи асосии ин санҷишҳо таъмини бехатарии санитарӣ, ҳифзи саломатии аҳолӣ ва пешгирии паҳншавии бемориҳои сироятӣ мебошанд.

Зикр гардид, ки дар натиҷаи санҷишҳо 5925 килограмм маҳсулоти хӯроквории пастсифат ва муҳлати истеъмолаш гузашта аз муомилот боздошта шудааст. Арзиши умумии ин маҳсулот 230 ҳазору 729 сомонӣ-ро ташкил медиҳад. Маҳсулоти мусодирашуда тибқи тартиби муқарраргардида пурра нобуд карда шудааст.

Барои муқоиса, соли 2024 ҳаҷми маҳсулоти хӯроквории аз муомилот боздошташуда 413 ҳазору 77 килограмм буда, арзиши он ба 5 миллиону 140 ҳазору 464 сомонӣ баробар шудааст.

Вазири тандурустӣ таъкид намуд, ки назорати давлатии санитарию эпидемиологӣ яке аз самтҳои калидии фаъолияти соҳа ба шумор рафта, минбаъд низ чораҳои назоратӣ бо мақсади таъмини амнияти озуқаворӣ ва ҳифзи саломатии шаҳрвандон тақвият дода хоҳанд шуд.

Яҳё МАҲМАДНАБИЕВ, “ҶТ”