Имрӯз зимни нишасти хабарӣ Раҳимзода Султон, раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон иттилоъ дод, ки ба ҳолати 1 июли соли 2026 дар ҷумҳурӣ 391,3 ҳазор субъектҳои хоҷагидор фаъолият доранд, ки ин нишондиҳанда нисбат ба ҳамин давраи соли гузашта 16,1 ҳазор адад ё 4,3% зиёд мебошад.

Ба гуфтаи ӯ, аз шумораи умумии субъектҳои хоҷагидор 354,8 ҳазор ададашро соҳибкорони инфиродӣ ташкил дода, шумораи онҳо нисбат ба ҳамин давраи соли 2025-ум 15,2 ҳазор адад ё 4,5 фоиз афзоиш ёфтааст.

Ҳамчунин, шумораи соҳибкорзанони фаъол ба 108,7 ҳазор нафар расида, 28 фоизи шумораи умумии субъектҳои хоҷагидорро ташкил медиҳад.

Зикр гардид, ки тибқи маълумоти Бонки миллии Тоҷикистон, дар нимсолаи аввали соли 2026 аз ҷониби ташкилотҳои қарзии молиявӣ ба соҳибкорон 7,8 миллиард сомонӣ қарз пешниҳод шудааст, ки нисбат ба ҳамин давраи соли гузашта 13,7 фоиз зиёд мебошад.

Ҳамзамон, дар ин давра бо маблағи 4,5 миллиард сомонӣ ба занон, аз ҷумла соҳибкорзанон, қарз пешниҳод шудааст, ки нисбат ба ҳамин давраи соли гузашта 28,7 фоиз афзоиш ёфтааст.

Инчунин, дар давраи ҳисоботӣ бо мақсади баланд бардоштани маърифати соҳибкорӣ аз ҷониби Кумита беш аз 300 тренинги омӯзишӣ вобаста ба имтиёзҳои андозию гумрукӣ, бақайдгирии фаъолияти соҳибкорӣ, таҳияи нақшаи тиҷоратӣ, ҷалби сармоя ва дигар масъалаҳои муҳими соҳибкорӣ баргузор гардид.

Гулафшон КАРИМОВА, “ҶТ”