Раиси Кумитаи меъморӣ ва сохтмони назди Ҳукумати Ҷумҳурии Тоҷикистон шарҳ дод, ки чӣ гуна шаҳрвандон дар харидани манзилҳои истиқоматӣ аз ширкатҳои сохтмонӣ фиреб нахӯранд.

Мирзозода Низом, раиси Кумитаи меъморӣ ва сохтмон ин нуктаро имрӯз - 29 январ зимни нишасти хабарӣ бо рӯзноманигорон иброз дошт.

Номбурда шарҳ дод, ки имрӯз аз ҷониби Кумита дар тамоми хиёбонҳои шаҳр кюардкодҳое насб шудаанд, ки сокинон метавонанд тавассути он тамоми маълумотҳои заруриро пайдо намоянд.

- Дар маълумотнома ширкатҳое, ки аз боварӣ баромадаанд, дар рӯйхати сурх қарор доранд ва бояд аз он ширкат набояд харидорӣ кунанд, -гуфт номбурда.

Инчунин, Мирзозода зикр кард, ки айни замон комиссияи корӣ ҷиҳати аз нав дида баромадани Кодекси шаҳрдорӣ тартиб дода шудааст, ки дар натиҷаи қабули он ин мушкилиҳо ҳалли худро меёбанд.

Раиси Кумита, ҳамзамон, гуфт, ки дар ин самт бояд маърифати ҳуқуқии шаҳрвандон низ баланд бардошта шавад.

Бино ба иттилои Кумита дар соли 2025 аз ҷониби шаҳрвандон 68 арзу шикоятҳо оиди аз соҳибони сохтмонҳои кишвар ворид шудааст.

Фарзонаи УМАРАЛӢ, “ҶТ”