93 фоизи хатмкунандагони Донишгоҳи технологии Тоҷикистон дар соли 2025 бо кор таъмин шудаанд. Дар ин бора имрӯз - 28 январ Зоир Раҳмонзода, ректори Донишгоҳ зимни нишасти матбуотӣ иттилоъ дод.

Ба қавли ректори Донишгоҳ моҳи майи соли 2025 бо ҷалби зиёда аз 40 ширкату корхона намоишгоҳ ва ярмаркаи ҷойҳои кории холӣ барои хатмкунандагон баргузор кардаанд, ки барои пайдо намудани ҷойҳои корӣ мусоидат намуд.

- Аз 476 хатмкунандаи шуъбаи рӯзона 443 нафарашон бо ҷойи кор таъмин гардиданд, ки дар умум 93 фоизро ташкил медиҳад ва нисбат ба соли 2024, 10,4 фоиз зиёд мебошад. Ин яке аз дастовардҳои беҳтарини Донишгоҳ дар соли гузашта буд,- зикр дошт ректор.

Ҳамчунин, иттилоъ дода шуд, ки айни ҳол наздик ба 300 нафар донишҷӯ аз курси якум то чорум баробари донишомӯзӣ дар корхонаҳо тариқи ним басти корӣ ба касбу кори гуногун бо шуғл фаро гирифта шудаанд.

Гулафшон КАРИМОВА, “ҶТ”