Дар соли 2025 шумораи истифодабарандагони интернет дар Тоҷикистон ба 5,2 миллион нафар расидааст.

Дар ин бора имрӯз - 28 январ Исфандиёри Саъдулло, сардори Хадамоти алоқаи назди Ҳукумати Ҷумҳурии Тоҷикистон зимни баргузори нишасти хабарии ниҳоди зери идорааш иттилоъ дод.

Ба гуфтаи сардори Хадамот, дар Ҷумҳурии Тоҷикистон ин шумора нисбат ба соли 2024 (4,5 миллион нафар) зиёда аз 700 ҳазор нафар афзоиш ёфтааст. Аз ин шумора 5,1 миллион нафар истифодабарандагони интернети мобилӣ мебошанд.

Тибқи иттилои Хадамот, шумораи умумии муштариёни пайвастшуда ба шабакаҳои алоқаи барқӣ дар кишвар 8,2 миллион нафарро ташкил медиҳад (дар соли 2024 — 8 миллион нафар). Аз ин теъдод 7,8 миллион нафар муштариёни алоқаи мобилӣ ва 5,9 миллион нафар муштариёни фаъоли алоқаи мобилӣ ба ҳисоб мераванд.

Ҳамзамон, зикр гардид, ки айни ҳол хизматрасонии интернет дар ҷумҳурӣ аз ҷониби 6 ширкати алоқаи мобилӣ ва 30 ширкати алоқаи собит пешниҳод мегардад.

Фарзонаи УМАРАЛӢ, “ҶТ”