Дар ин бора Абдураҳмонзода Абдураҳмон, вазири рушди иқтисод ва савдои Ҷумҳурии Тоҷикистон имрӯз - 11 феврал зимни нишасти матбуотӣ иттилоъ дода, афзуд, ки сатҳи таваррум дар Тоҷикистон дар соли 2025 ба 3,5 фоиз баробар гардид, ки нисбат ба соли 2024 (3,6 фоиз) 0,1 банди фоизӣ кам мебошад.

Ба гуфтаи вазир сатҳи таваррум дар байни кишварҳои минтақа ва ҷаҳон муътадил арзёбӣ мегардад.

- Сатҳи таваррум дар давраи ҳисоботӣ асосан аз ҳисоби болоравии нархи маҳсулоти озуқаворӣ 4,5 фоиз, молҳои ғайриозуқа 1,5 фоиз ва хизматрасониҳо 5,7 фоиз ташаккул ёфтааст, - баён дошт вазири рушди иқтисоди кишвар.

Ҳамзамон, зикр гардид, ки суръати рушди иқтисоди миллӣ дар ин давра асосан аз ҳисоби афзоиши ҳаҷми истеҳсоли маҳсулоти саноатӣ 22,1 фоиз, кишоварзӣ 9,5 фоиз, гардиши савдо 13,9 фоиз, мусофиркашонӣ 10,9 фоиз, хизматрасониҳои пулакӣ 13,2 фоиз, боркашонӣ 15,2 фоиз ва маблағгузорӣ ба сармояи асосӣ 23 фоиз таъмин гардидааст.

Гуфта шуд, ки нигоҳдории сатҳи муътадили таваррум дар баробари афзоиши нишондиҳандаҳои асосии иқтисодӣ ба таҳкими суботи макроиқтисодӣ ва рушди устувори кишвар мусоидат хоҳад кард.

Фарзонаи УМАРАЛӢ, “ҶТ”