Дар моҳи Рамазон дар сурати беҳтар гардидани вазъи гидрологӣ соатҳои истифодаи неруи барқ барои аҳолии Тоҷикистон зиёд карда мешавад. Дар ин бора Далер Ҷумъа, вазири энергетика ва захираҳои оби Ҷумҳурии Тоҷикистон, имрӯз – 29 январ зимни нишасти матбуотӣ иттилоъ дод.

Ба гуфтаи вазир, дар ҳолати зиёд шудани резиши об ба обанборҳои неругоҳҳои барқи обӣ, имконият фароҳам меояд, ки маҳдудиятҳои ҷорӣ дар таъминоти неруи барқ сабуктар гардида, соатҳои истифодаи он барои аҳолии кишвар то 2–3 соат дар як шабонарӯз дароз карда шавад.

Зикр гардид, ки Тоҷикистон ҳамчун кишвари дорои иқтидори бузурги гидроэнергетикӣ, дар фасли зимистон бинобар кам гардидани сатҳи об дар обанборҳо бо маҳдудиятҳои муваққатии барқ рӯ ба рӯ мешавад. Дар моҳҳои сард, бахусус дар ноябр ва декабри соли 2025, сокинони кишвар аз қатъи тулонии неруи барқ бештар шикоят доштанд.

Бояд гуфт, ки дар ҳоли ҳозир аҳолӣ дар як шабонарӯз ба ҳисоби миёна 6–7 соат бо неруи барқ таъмин мебошанд. Ин нишондод бо назардошти эҳтиёҷоти рӯзмарраи сокинон маҳдуд арзёбӣ мешавад.

Масъулини соҳа таъкид мекунанд, ки бо фаро расидани фасли баҳор, обшавии барфу пиряхҳо ва афзоиши резиши об ба дарёҳо, истеҳсоли неруи барқ тадриҷан зиёд мегардад. Дар ҳамин замина, интизор меравад, ки таъминоти неруи барқ дар моҳи Рамазон нисбат ба дигар моҳҳо беҳтар шавад.

Яҳё МАҲМАДНАБИЕВ, “ҶТ”