Дар вилояти Суғд Иди Сада бо шукуҳ ва риояи анъанаҳои неки ин ҷашни аҷдодӣ таҷлил гардид. Дар макони баргузории чорабинӣ аз ҷониби намояндагони шаҳру ноҳияҳо гӯшаҳо ороста шуда, маҳсули дасти ҳунармандон, таъомҳои миллӣ, ниҳоли дарахтони мевадиҳандаву ороишӣ, тухмии гулу зироат ва дигар маҳсулот ба намоиш гузошта шуд.

Раиси вилояти Суғд Раҷаб Аҳмадзода аз муҳимияти таҷлили ҷашни Сада ёдовар шуда, илова намуд, ки ин ҷашни аҷдодии халқи куҳанбунёди тоҷик дар замони Истиқлоли давлатӣ бо ташаббуси Пешвои миллат муҳтарам Эмомалӣ Раҳмон дубора эҳё гардида, имрӯз дар сартосари кишвар бо урфу одатҳои қадима ва шукуҳу шаҳомати хосса таҷлил мегардад.

Дар идома гуфта шуд, ки Сада аслан ҷашни деҳқонону кишоварзон буда, миёни тоҷикон бо хусусиятҳои мардумиаш маҳбубияти хосса касб намудааст. Дар ин айём марди деҳқон омодагиро ба фасли баҳор оғоз менамояд, аз пайи таъмиру тайёр намудани таҷҳизоти кишоварзӣ мешавад, нақшаи бунёди боғу токзор ва дигар корҳои баҳориро тарҳрезӣ менамояд.

Субҳиддин ҚОДИРОВ, “ҶТ”