23 август дар Боғи фарҳангию фароғатии “Ирам”-и шаҳри Душанбе бахшида ба 35-солагии Истиқлоли давлатии Ҷумҳурии Тоҷикистон рӯзҳои фарҳангии шаҳри Хоруғ баргузор гардид.

Дар доираи чорабинӣ маҳсулоти кишоварзию саноатӣ, ҳунарҳои мардумӣ, таомҳои миллӣ, дастовардҳои варзишӣ ва барномаҳои фарҳангиву адабии шаҳри Хоруғ ва Вилояти Мухтори Кӯҳистони Бадахшон ба сокинону меҳмонони пойтахт муаррифи шуданд. Дар чорабини раиси ноҳияи Исмоили Сомонӣ Қодирзода Руслан Раҷаб ва раиси Вилояти Мухтори Кӯҳистони Бадахшон Сафарзода Шарифхон Нураҳмад иштирок намуданд. Ба масъулини ВМКБ барои ҳамкории судманд ва муаррифии дастовардҳои вилоят дар пойтахти мамлакат сипосномаи Мақомоти иҷроияи ҳокимияти давлатии ноҳияи Исмоили Сомонӣ тақдим гардид.

Нахуст меҳмонон аз намоиши маҳсулоти кишоварзӣ ва саноатӣ, ҳунарҳои мардумӣ, таомҳои миллӣ ва дастовардҳои иҷтимоиву иқтисодии ВМКБ дидан карданд. Меҳмонон ба сифату гуногунии маҳсулоти пешниҳодшуда баҳои баланд дода, заҳмати сокинони вилоятро қадрдонӣ намуданд.

Дар идомаи чорабинӣ дастовардҳои варзишгарони Вилояти Мухтори Кӯҳистони Бадахшон муаррифӣ гардиданд. Зикр шуд, ки варзишгарони вилоят солҳои охир дар мусобиқаҳои ҷумҳуриявӣ ва байналмилалӣ фаъолона иштирок намуда, ба гирифтани ҷойҳои ифтихорӣ ва медалҳои гуногун ноил шудаанд.

Дар ҷамъбасти чорабинӣ ҳунармандони шинохтаи вилоят бо суруду таронаҳои ватандӯстона барномаи рангини фарҳангиро пешкаши иштирокчиён ва меҳмонон намуданд.

М. МУҚАДДАМОВА, “ҶТ”