Носир Саид, раиси Кумитаи телевизион ва радиои назди Ҳукумати Ҷумҳурии Тоҷикистон дар ҷараёни нишасти матбуотӣ аз баргузории маросими “Суруди сол”-и имсола изҳори қаноатмандӣ намуд. Ба гуфтаи ӯ, ин чорабинӣ дар сатҳи ниҳоят баланд баргузор шуда, ба талаботи касбӣ ва эҷодӣ ҷавобгӯ буд.

Носир Саид дар посух ба суоли хабарнигорон вобаста ба овозаҳо ва ҳадсу гумонҳо дар мавриди ноодилона баргузор гардидани ин маросим таъкид кард, ки раванди баргузории “Суруди сол” шаффоф ва қонеъкунанда сурат гирифтааст.

“Баргузории “Суруди сол” маро бисёр қаноатманд кард. Маросим дар сатҳи хеле баланд баргузор шуд ва дар он сарояндагони шинохта бо сурудҳои нав иштирок намуданд”, — иброз дошт раиси Кумита.

Ёдовар мешавем, ки маросими супоридани ҷоизаи “Суруди сол” аз соли 2002 инҷониб дар Тоҷикистон баргузор гардида, ҳамасола ба сарояндагоне тақдим мешавад, ки дар давоми сол фаъолияти эҷодии фаъол дошта, сурудҳои тоза эҷод кардаанд. Ин маросим яке аз муҳимтарин рӯйдодҳои фарҳангии кишвар ба шумор меравад.

Бо вуҷуди ин, маросими имсолаи “Суруди сол”, ки масъулияти баргузории он бар дӯши Кумитаи телевизион ва радио ва Вазорати фарҳанги Ҷумҳурии Тоҷикистон вогузор шуда буд, дар шабакаҳои иҷтимоӣ боиси баҳсу норизогиҳо гардид. Бархе аз корбарон изҳор доштанд, ки аксари сарояндагоне, ки дар ин маросим ҳунарнамоӣ карданд, сурудҳои куҳнаро иҷро намуданд. Ба гуфтаи онҳо, баъзе аз ин таронаҳо ҳатто ба 6–7 соли пеш тааллуқ дошта, ба меъёрҳои озмуни “Суруди сол” мутобиқат намекунанд.

Ин вокунишҳо дар фазои маҷозӣ баҳсҳои густурдаеро ба миён оварданд ва бархе аз ҳаводорони мусиқӣ хостори бознигарӣ дар меъёрҳои интихоб ва пешниҳоди сурудҳо дар чунин чорабиниҳои фарҳангӣ шуданд.

Бо вуҷуди танқидҳо, масъулин баргузории маросими имсоларо муваффақ арзёбӣ намуда, таъкид мекунанд, ки ҳадафи асосии “Суруди сол” тарғиби мусиқии миллӣ, дастгирии эҷодиёти сарояндагон ва боло бурдани завқи фарҳангии ҷомеа мебошад.

Яҳё МАҲМАДНАБИЕВ, “ҶТ”