Дар телевизионҳои давлатии Тоҷикистон барои таҳияи барномаҳои таҳлиливу танқидӣ ҳеҷ маҳдудияте вуҷуд надорад.

Дар ин бора имрӯз - 21 июл Носир Саид, раиси Кумитаи телевизион ва радиои назди Ҳукумати Ҷумҳурии Тоҷикистон дар нишасти хабарии ниҳоди зери идорааш иттилоъ дод.

Ӯ гуфт, ки Кумита аз чунин барнормаҳо ба хубӣ истиқбол мекунад ва дар телевизионҳои Тоҷикистон барои пахши барномаҳои таҳлилӣ ва танқидӣ ҳеҷ маҳдудияте вуҷуд надорад.

Ёдовар мешавем, ки масъалаи кам будани барномаҳои таҳлилӣ ва танқидӣ соли гузашта дар нишасти хабарии ин кумита мавриди баҳсу баррасӣ қарор гирифта буд. Раиси вақти Кумита Нуриддин Саид идао карда буд, ки худ хостори нашри бештари барномаҳои танқидӣ дар телевизионҳои давлатӣ мебошад.

Ин нуқтаро ҳам Носир Саид шарҳ дода, ҷой доштани танқид ва таҳлилро дар барномаҳои иттилоотии телевизионҳои кишвар махсус қайд намуд.

Яҳё МАҲМАДНАБИЕВ, “ҶТ”