Бо мақсади риояи фарҳанги шаҳрнишинӣ, тарбияи экологӣ дар ҷомеа ва покизаву озода нигоҳ доштани гирду атрофи биноҳои баландошёна дар шаҳри Душанбе нуқтаҳои махсуси партовҷамъкунии зеризаминӣ бунёд мешавад.

Дар ин хусус аз Кумитаи ҳифзи муҳити зисти назди Ҳукумати Ҷумҳурии Тоҷикистон ба рӯзномаи “Ҷавонони Тоҷикистон” иттилоъ доданд.

- Дар ҳар қуттӣ ҷойгир намудани кадом навъ партов навишта шудааст. Чунин тарзи муносибат ба партов имконият медиҳад, ки шаҳрвандон дар алоҳидагӣ партовро ба навъҳо ҷудо намуда, сипас онро ба қуттиҳо гузоранд. Яъне, бо баланд гардидани маърифатнокии экологии аҳолӣ ва муносибати дилсӯзонаи шаҳрвандон нисбат ба муҳити зист шароите фароҳам оварда мешавад, ки покизагии муҳити зист таъмин гашта, шаҳрвандон дар муҳити поку озода фаъолият намоянд, - омадааст дар иттилоия.

Инчунин , иттилоъ дода шуд, ки барои пешгирӣ намудани ҳолатҳои дар ҷойҳои номувофиқ партофтани партов дар 50 нуқтаи осебпазири ҳудуди ноҳияҳои пойтахт камераҳои мушоҳидавӣ насб карда шуда, ҳамарӯза аз болои онҳо назорат бурда мешавад.

Ҷасури ҚИЁМИДДИН, “ҶТ”