Бо мақсади бо ҷойи кор таъмин намудани шаҳрвандони ҷумҳурӣ дар хориҷи кишвар давоми шаш моҳи гузашта 23 ҳазору 584 нафар берун аз ҷумҳурӣ бо ҷойи кор таъмин гардидаанд. Аз ин шумора тавассути сохторҳои вазорат 22 ҳазору 761 нафар ба 16 давлат сафарбар шудаанд.

Дар ин бора Солеҳа Холмаҳмадзода вазири меҳнат муҳоҷират ва шуғли аҳолии Ҷумҳурии Тоҷикистон 13 июл зимни нишасти хабарӣ иттилоъ дод.

Ҳамчунин вазир зикр кард, ки дар нимсолаи якуми соли ҷорӣ сафари 3953 шаҳрванди Тоҷикистон ба Федератсияи Россия пешгирӣ карда шуда, ба 2161 нафар барои омӯзиши касбу ҳунар ва баланд бардоштани малакаи касбӣ дар муассисаҳои таълимии низоми Вазорат тавсияҳо дода шудааст.

- Дар ин давра дар натиҷаи ҳамкориҳои доимии Намояндагӣ бо мақомоти дахлдори Россия 22 млн. 454, 4 ҳазор рубли музди меҳнати пардохт нагардидаи муҳоҷирон, аз ҷониби корфармоён ба муҳоҷирони меҳнатӣ баргардонида шуд,- гуфт Холмаҳмадзода.

Сайёраи ҚИЁМИДДИН, “ҶТ”