Кумитаи кор бо ҷавонон ва варзиши назди Ҳукумати кишвар дар якҷоягӣ бо Иттифоқи ҷавонони Тоҷикистон аксияи наверо таҳти унвони “Як ҷавон – як дарахт” ба роҳ мондаанд. Дар ин бора аз Кумитаи кор бо ҷавонон ва варзиш хабар доданд.

Масъулин ҳадаф аз баргузории аксияро саҳмгузорӣ дар сарсабзиву шукуфои диёр, пешгирӣ аз гармшавии иқлим ва боло бурдани фарҳанги экологии ҷавонон унвон карданд.

Ба иттилои масъулин дар Тоҷикистон тақрибан 3 000 000 аҳолии кишварро ҷавонони аз 14 то 35 сола ташкил медиҳанд ва агар ҳар як ҷавон танҳо 1 дарахт шинонад, 3 млн дарахт дар як сол зиёд мешавад ва агар ҳар ҷавон аз 5 то 10 дарахт сабз кунад, ҳудуди он аз 15 то 30 млн меафзояд.

Дастандаркорони аксия бо роҳандозӣ кардани он мехоҳанд ниҳолшинониро ба ҳаракати миллӣ табдил диҳанд ва аз ҷавонон хостаанд, ки барои сарзабзии диёр дарахт шинонидаву аз он акс бигиранд ва он аксҳоро дар шабакаҳои иҷтимоӣ паҳн намоянд.