Дар шашмоҳаи аввали соли 2024 аз ҷониби Кумитаи кор бо ҷавонон ва варзиши назди Ҳукумати кишвар ва ташкилотҳои ҷамъиятии федератсияҳои варзишии ҷумҳурӣ 569 варзишгар, аз ҷумла 108 бонуи узви дастаҳои мунтахаби Ҷумҳурии Тоҷикистон аз намуди варзиши олимпӣ ва ғайриолимпӣ ба 28 мусобиқаи сатҳи байналмилалии варзишӣ сафарбар гардида, дар натиҷа ба хазинаи варзишии кишвар 207 медал, аз ҷумла 55 тилло, 52 нуқра ва 103 биринҷӣ ворид намудаанд.

Дар ин бора 5 август Шабнам Раҳимзода, муовини аввали раиси КҶВ зимни нишасти матбуотӣ иттилоъ дод.

Номбурда дар идома қайд кард, натиҷаҳои бадастовардаи варзишгарон нисбат ба ҳамин давраи соли гузашта 67 медал, аз ҷумла 12 тилло, 20 нуқра ва 35 биринҷӣ зиёд мебошад.

- Маврид ба зикр аст, ки 210 маротиба Парчами давлатии Ҷумҳурии Тоҷикистон дар мусобиқаҳои сатҳи байналмилалӣ бо шарофати дастоварди варзишгаронамон баланд бардошта шуда, 55 маротиба Суруди миллӣ ба хотири дастоварди онҳо дар мусобиқаҳои сатҳи ҷаҳонӣ садо додааст, - гуфт Шабнам Раҳимзода.

Ҳамчунин, дар идома қайд карда шуд, ки дар давраи ҳисоботӣ варзишгарони тоҷик тавонистанд, ба як қатор дастовардҳое ноил шаванд, ки дар таърихи давраи соҳибистиқлолии кишвар бесобиқа мебошад. Аз қабили:

1. Бори аввал дар кишвар мусобиқаи бонуфузи байналмилалии "Гранд- Слам Душанбе-2024" бо иштироки 446 нафар варзишгар аз 65 давлати ҷаҳон баргузор гардид, ки варзишгаронамон 7 медал, аз ҷумла 1 тилло, 3 нуқра ва 3 биринҷӣ ба даст оварданд;

2. Бори нахуст варзишгаронамон дар таърихи соҳибистиқлолии кишвар аз рӯи намуди футзал ба марҳилаи ниманиҳоии чемпионати Осиё роҳ ёфта, роҳхати Чемпионати ҷаҳон оид ба футзалро пайдо намуданд;

3. Бори нахуст 6 варзишгари тоҷик аз риштаи чудо роҳхати Бозиҳои олимпии Париж 2024-ро соҳиб гардиданд, ки дар таърихи ҷудои варзишии кишвар беназир аст;

4. Бори аввал дар таърихи соҳибистиқлолӣ аз риштаи варзиши Таеквандо варзишгарбонуи мо роҳхати Бозиҳои олимпии Париж 2024-ро соҳиб гардид;

5. Бори нахуст ду нафар аз риштаи ҷудо ва як нафар аз намуди бокс сазовори медалҳои Бозиҳои олимпӣ гардиданд ва таърихсозӣ намуданд.

- Ҳамзамон бояд ёдовар шуд, ки Кумита дар ҳамкорӣ бо соҳибкорону ташаббускорони ватанӣ тасмим гирифтааст, ки ғолибону ҷоизадорони Бозиҳои тобистонаи олимпии Париж 2024 - ро бо мукофотпулӣ қадршиносӣ намояд. Маврид ба тазаккур аст, ки ғолиби ҷойи аввал бо 20 000 доллари ИМА, ғолиби зинаи дуюм 15 000 доллари ИМА ва ғолиби мақоми сеюм бо 10 000 доллари ИМА ҳавасманд карда мешаванд.

Ҳошим РАҲМАТУЛЛОЕВ, “ҶТ”