Имрӯз, дар доираи нақша - чорабиниҳои муштараки Кумитаи кор бо ҷавонон ва варзиши назди Ҳукумати Ҷумҳурии Тоҷикистон якҷо бо Мақомоти иҷроияи ҳокимияти давлатии вилояти Суғд ва федератсияҳои варзишии кишвар дар Муассисаи таҳсилоти умумии ғайридавлатии “Контакт”-и шаҳри Исфара маросими кушодашавии мусобиқаи байналмилалии варзишии дӯстона оид ба шоҳмот баргузор гардид.

Дар ин бора аз бахши таҳлил ва иттлооти Кумитаи кор бо ҷавонон ва варзиш хабар доданд.

Ба иттилои манбаъ маросими кушодашавии мусобиқаи байналмилалӣ таҳти раёсати Муҳаммадтолиб Шокирзода, муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҷараён гирифта, дар он ҳамчунин Суруриддин Зиёваддинзода, муовини раиси шаҳри Исфара, Бахтиёр Исматзода, сардори Раёсати кор бо ҷавонон ва варзиши вилояти Суғд ва Ҳакимов Азизҷон, директори Муассисаи таҳсилоти умумии ғайридавлатии “Контакт” иштирок ва суханронӣ намуда, меҳмонону иштирокчиёни чорабиниро, ки аз кишварҳои Ӯзбекистон ва Қирғизистон омада буданд, хайрамақдам гуфтанд.

Гуфта мешавад, ки мусобиқа дар доираи ташрифи сарони давлатҳои Ӯзбекистон ва Қирғизистон ба Ҷумҳурии Тоҷикистон роҳандозӣ шуда, то 3 март идома хоҳад ёфт.