Аз 2 то 6 октябр дар варзишгоҳи ҷумҳуриявии шаҳри Душанбе марҳилаи интихобии Чемпионати Осиё 2020 доир ба футбол байни футболбозон (U-19) идома ёфт. Дар ин мусобиқа дастаи мунтахаби футболбозони ҷавони тоҷик дар гурӯҳи “С” бо мунтахабҳои Лубнон, Сурия, Молдив сабқат намуданд.

Дар бозии нахустин дар даври аввали марҳилаи интихобӣ мунтахаби ҷавонони Тоҷикистон дастаи мунтахаби ҷавонони Молдивро бо ҳисоби 9:0 шикаст доданд. Бозӣ аз аввал то анҷом пурра дар дасти футболбозони тоҷик буд ва эшон тавонистанд бо ҳисоби калон пирӯзӣ ба даст оранд. Дар рафти бозӣ бозингарони тими мунтахаби ҷавонони мо Шаҳром Самиев 3 гол, Ислом Зоиров, Шарифбек Раҳматов дуголӣ, Манучеҳр Сафаров як голӣ ба дарвозаи ҳариф расониданд. Дар давраи дуюм бошад, 4 октябр футболбозони мо муқобили ҳамсолонашон аз Лубнон вориди майдон гаштанд, ки ин рақобат ҳам ба пирӯзӣ анҷом ёфт. Голи Шаҳром Самиев ба тими мунтахаби ҷавонони Тоҷикистон муқобили Лубнон дар даври дуюм пирӯзӣ овард. Шогирдони Зайниддин Раҳимов дар даври ниҳоӣ бар тими ҷавонони Сурия бо ҳисоби 1:0 пирӯз шуданд. Голи ягонаро дар дақиқаи 23-юми дидор Шаҳром Самиев зад.

Ҳамин тариқ, бо ба даст овардани 9 хол аз 9 холи имконпазир мунтахаби ҷавонони Тоҷикистон дар гурӯҳи “С” ҷои аввалро ишғол карда, ба марҳилаи финалии Чемпионати Осиё-2020, ки соли оян дар дар Ҷумҳурии Узбекистон баргузор мешавад, роҳхат гирифт.

Имрӯз қаҳрамонии футболбозони ҷавони тоҷик, ки дар бозии марҳилаи интихоботӣ ба дастоварди намоёни варзишӣ ноил шуда роҳхатро ба даст оварданд, вирди забони хурду калони кишвар, алалхусус мухлисони сершумори футбол гаштааст. Дар ҳар як гӯшаву канори кишвар аз ин дастоварди варзишии футболбозони тоҷик, ки дар таърихи футболи тоҷик беназир аст, сухан мегӯянду ин комёбии нотакрор руҳияи мардуми шарафманди тоҷикро басо болида ва сафи мухлисону дӯстдорони сершумори футболро дар кишварамон боз ҳам афзун намудааст. Ин ҳар як мухлиси футболи тоҷикро водор месозад, ки то охирин лаҳзаҳои рақобат бо футболбозони ҷавони кишвар по ба по, қадам ба қадам ҳамроҳ бошанду гармтару самимитар аз эшон истиқбол гиранд.

Зайниддин Раҳимов сармуррабии тими футболбозони тоҷик, ки заҳматҳояш дар пирӯзии дастаи мунтахаби ҷавонон кам нест, доир ба муваффақияти дастааш чунин иброз дошт, ки дар давраи соҳибистиқлолӣ Ҳукумати кишвар футболро яке аз омили муттаҳидкунандаи миллату давлат дониста, барои рушд ёфтани ин намуди варзиш таваҷҷуҳи хосса зоҳир менамояд. “Бо дастгириҳои Президенти Федератсияи Футболи Тоҷикистон муҳтарам Рустами Эмомалӣ барои роҳхат гирифтани ҷавонон ба чемпионати Осиё тамоми имкониятҳоро истифода бурдем. Албатта, ин боиси хушнудист, ки имрӯз мо ҳарифонамонро шикаст дода роҳхатро ба даст овардем. Ман боварии комил дорам, ки футболбозони мо дар чемпионат ҳарифонашонро шикаст дода, бо муваффақият ба ватан бармегарданд. Мо барои ба даст овардани ғолибият дар Чемпионати Осиё тамоми кӯшишҳоямонро ба харҷ медиҳем”.

Дар ҳақиқат дастоварди дастаи мунтахаби наврасони Ҷумҳурии Тоҷикистон оид ба футбол руҳияи мардуми шарафманди тоҷикро боло бардошта, дар дили наврасон шавқу ҳавасро нисбат ба шоҳи варзиш бедор кард. Тӯли чанд рӯзе, ки футболбозони мо бо ҳарифони худ дар варзишгоҳи марказии шаҳри Душанбе бо ҳам омаданд, рисолати дарпешгузошташудаи хешро сарбаландона дифоъ намуда, соҳиби роҳхат ба марҳилаи ниҳоии мусобиқа гардиданд. Бояд зикр намуд, ки таркиби тими мутахаби ҷавонон аз ҳисоби тими наврасони 17 - солаи кишвар, ки соли гузашта роҳхат ба Чемпионати ҷаҳонро ба даст оварда буданд ва имсол футболи тоҷикро дар давлати Бразилия муаррифӣ месозанд, устухонбандӣ шудааст.

Нуралӣ Хоркашов, як корманди Федератсияи футболи кишвар аз ин пирӯзиҳои варзишгарон изҳори хушнудӣ карда, иброз дошт, ки ин дастоварди футболбозони ҷавон собиткунандаи он аст, ки дар даҳсолаи охир футбол дар Тоҷикистон дар ҳолати рушд қарор дорад. Ба андешаи ӯ метавон ба дилпурӣ изҳор дошт, ки дар чанд соли дигар рақибони футболбозони тоҷик пурнуфузтарин дастаҳои ҷаҳон хоҳанд шуд. Ӯ дар мавриди пирӯзии дастаи мунтахаби ҷавонон гуфт:
- Ба дарвозаи ҳарифони молдивӣ 9 голи беҷавоб ва ба Лубнону Сурия бо голҳои беҷавоб ғолиб шудан, албатта кори саҳл нест. Бо ин корнамоӣ ҷавонони мо дар Чемпиоанти Осиё, ки соли оянда дар Ҷумҳурии Узбекистон баргузор мегардад, бо ҳарифони пурқувват сари сабқат хоҳанд шуд. Ин аз ҳар дидгоҳ метавонад кишвари моро ба ҷомеаи ҷаҳонӣ ҳамчун кишвари қудратманд аз лиҳози варзиш муаррифӣ кунад. Аз ин рӯ мо тамоми варзишгарон ба роҳбарияти кишвар ва Федератсияи футболи Тоҷикистон миннатдории бепоён изҳор менамоем. Инчунин сипос ба футболбозони ҷавони мо, ки дар рақобатҳои душвор аз худ як нерумандӣ ва маҳорати баланд нишон дода, соҳиби роҳхат ба Чемпионати Осиё гардиданд. Ман тамоми дӯстдорони футболи тоҷикро ба ин муносибат таҳният гуфта, боварии комил дорам, ки футболбозони мо дар Чемпионати Осиё хуб сабқат намуда, футболи миллати тоҷикро дар арсаи байналмилалӣ бори дигар муаррифӣ месозанд, - гуфт, Н. Хоркашов.

Дар воқеъ ситораҳои футболи тоҷик, дар таърихи футболи кишвар собит сохтанд, ки футболи тоҷик метавонад, дар сабқатҳои бузурги сатҳи ҷаҳонӣ истодагарӣ намояд. Албатта, ин муваффақияти футболбозони мо ва он ҳама дастовардҳои варзишии сатҳи ҷаҳонӣ, ки дар давраи соҳибистиқлолӣ то имрӯз варзишгаронамон ба даст оварданд, пеш аз ҳама аз дастгириҳои Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон нисбати варзиш аст. Танҳо тӯли чанд соли охир шоҳиди навгониҳои зиёд дар мисоли бунёди иншоотҳои бузурги муосири варзишӣ, оммавигардонии варзиш дар байни аҳолӣ гардида истодаем. Таваҷҷуҳи хоссаи Федератсияи футболи Тоҷикистон ба рушди футбол сол ба сол натиҷаҳои дилхоҳ дода истодааст. Комёбие, ки ҷавонон дар риштаи футбол ба даст оварданд, далели бебаҳои ин гуфтаҳост. Мардуми Тоҷикистон бояд итминони комил дошта бошанд, ки футболбозони мо бо садоқати баланд, масъулият ва машқу тамринҳо дар Чемпионати Осиё оид ба футбол дар кишвари Узбекистон бо ғалаба ба Ватан бармегарданд ва бори дигар шарафи кишварро дар арсаи байналмилалӣ ҳимоя менамоянд.