Иштироки фаъолонаи варзишгарони касбӣ дар мусобиқаҳои бонуфузи байналмилалӣ яке аз самтҳои муҳими муаррифии Ҷумҳурии Тоҷикистон дар арсаи ҷаҳонӣ ба ҳисоб меравад. Дар ин замина, Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар соли 2025 ҷиҳати расидан ба ҳадафҳои гузошташуда ва баланд бардоштани нуфузи варзиши миллӣ як қатор тадбирҳои муассирро амалӣ намудааст.

Тавре дар нишасти матбуотии Кумита иттилоъ дода шуд, бо мақсади рушди варзиши касбӣ ва омодасозии варзишгарони рақобатпазир, ҳамкориҳои доимӣ бо ташкилотҳои ҷамъиятии федератсияҳои варзишии кишвар, сармураббиёни дастаҳои мунтахаб, муассисаҳои тайёрии варзишии Кумита ва сохторҳои маҳаллӣ ба роҳ монда шудааст.

Зикр гардид, ки дар соли 2025 аз ҷониби Кумита ва федератсияҳои варзишии Ҷумҳурии Тоҷикистон 1 ҳазору 540 нафар варзишгар, аз ҷумла 450 нафар бонувон, ки узви дастаҳои мунтахаби кишвар аз намудҳои варзиши олимпӣ ва ғайриолимпӣ мебошанд, ба 112 мусобиқаи сатҳи байналмилалӣ сафарбар гардидаанд. Дар натиҷаи иштироки фаъолонаи варзишгарон ба хазинаи варзишии мамлакат 510 медал, аз ҷумла 140 медали тилло, 166 нуқра ва 204 биринҷӣ ворид шудааст.

Таъкид шуд, ки ин нишондиҳанда нисбат ба соли 2024 62 медал зиёд мебошад. Аз ҷумла, теъдоди медалҳои тилло 6 адад, нуқра 58 адад ва биринҷӣ 2 адад афзоиш ёфтааст, ки аз болоравии сатҳи касбият ва омодагии варзишгарони тоҷик дарак медиҳад.

Ҳамзамон, дар соли 2025 510 маротиба Парчами давлатии Ҷумҳурии Тоҷикистон дар мусобиқаҳои сатҳи байналмилалӣ ба шарафи пирӯзиҳои варзишгарон баланд бардошта шуда, 140 маротиба Суруди миллӣ ба ифтихори дастовардҳои онҳо садо додааст. Ин муваффақиятҳо саҳми варзишгарони кишварро дар муаррифии Тоҷикистони соҳибистиқлол дар арсаи байналмилалӣ боз ҳам намоёнтар гардонид.

Илова бар ин, аз ҷониби дастгоҳи марказии Кумита дар давраи ҳисоботӣ 161 чорабинии варзиши касбӣ бо иштироки 17 ҳазору 250 нафар варзишгар, аз ҷумла 5 ҳазору 778 нафар бонувон, баргузор карда шудааст.

Дар маҷмуъ, аз ҷониби дастгоҳи марказии Кумита, сохторҳои маҳаллӣ ва муассисаҳои тайёрии варзишии шаҳру ноҳияҳои ҷумҳурӣ дар доираи марҳилаҳои гуногун 9 ҳазору 300 чорабинии варзиши касбӣ доир гардида, онҳо 691 ҳазору 640 нафар варзишгаронро фаро гирифтаанд. Ин нишондиҳандаҳо нисбат ба ҳамин давраи соли 2024 аз лиҳози теъдоди чорабинӣ 50 адад ва аз лиҳози фарогирии варзишгарон 50 ҳазору 890 нафар зиёд мебошад.

Яҳё МАҲМАДНАБИЕВ, “ҶТ”