Рӯзи 4-уми сентяб соати 16:00 дар Қасри теннис ва маҷмааи варзиши обии шаҳри Душанбе маросими ифтитоҳи мусобиқаи байналмилалии теннис байни наврасон барои дарёфти Ҷоми Президенти Тоҷикистон оғоз гардид.

Дар ин бора телеграм канали шаҳрдори Душанбе хабар медиҳад.

Тавре қаблан хабар дода будем, дар ин мусобиқа 64 варзишгар аз 13 давлат иштирок дорад. Аз ҷумла, варзишгарон аз Ҷумҳурии Мардумии Чин, Федератсияи Русия, Ҳиндустон, Эрон, Руминия, Уммон, Кореяи Ҷанубӣ, Узбекистон, Қирғизистон, Қазоқистон, Туркманистон, Тайланд ва Тоҷикистон байни ҳам рақобат мекунанд.
Маросими ифтитоҳи мусобиқа бо як шукуҳу шаҳомат оғоз гардида, баъд аз муаррифӣ гардидани ҳайати дастаҳо муовини Сарвазири Ҷумҳурии Тоҷикистон Дилрабо Мансурӣ ва Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Зулфиқор Гулаҳмадзода суханронӣ намуда, ҳамзамон аз таваҷҷуҳ ва ғамхориҳои доимии Ҳукумати мамлакат, хосса Президенти Ҷумҳурии Тоҷикистон муҳтарам Эмомалӣ Раҳмон нисбат ба рушди соҳаи тарбияи ҷисмонӣ ва варзиш ёдовар шуданд.

Иброз гардид, ки соҳаи тарбияи ҷисмонӣ ва варзиш яке аз рукнҳои арзишмантарин ва муҳимтарини ҷомеа барои тарбияи насли наврас ва инсоният ба ҳисоб меравад. Зеро мақсади асосии тарбияи ҷисмонӣ ва варзиш танҳо иборат аз таҳкими саломатии инсон нест, балки он бо тарбияи меҳнатӣ, ақлӣ, ахлоқӣ ва эстетикӣ низ пайванди ногусастанӣ дошта, муаррифи давлату миллат дар арсаи байналмилалӣ мебошад.

Яҳё МАҲМАДНАБИЕВ, “ҶТ”