Сафорати Ҷумҳурии Тоҷикистон дар Федератсияи Русия аз вазъи шаҳрвандони кишвар дар фурудгоҳи байналмилалии Внуковои Москва дидан намуда, бо масъулини фурудгоҳ ҷиҳати саривақт бозпас гардонидани шаҳрвандони кишвар ба ватан мулоқот карданд.

Дар ин бора сомонаи Сафорати Ҷумҳурии Тоҷикистон дар Федератсияи Русия иттилоъ медиҳад.

Тибқи иттилои манбаъ, рӯзи 12 июли соли ҷорӣ кормандони Хадамоти консулии Сафорат ҷиҳати пайгирии вазъи шаҳрвандони Ҷумҳурии Тоҷикистон ба фурудгоҳи байналмилалии Внуковои шаҳри Москва сафарбар гардиданд.

Гуфта мешавад, ки аз ҷониби консулгарӣ дар ҳамкорӣ бо ҳамватанони бурунмарзӣ ба нафароне, ки дар ин фурудгоҳ дармондаанд, маводи ғизоӣ пешкаш гардид. Иқдоми мазкур пайваста аз ҷониби намояндагии дипломатӣ роҳандозӣ мешавад.

Зикр гардид, ки танҳо дар фурудгоҳи Внуковои шаҳри Маскав 104 нафар шаҳрванди дармонда ва 91 нафари дигар соатҳои тулонӣ дар тафтиши мақомоти сарҳадии фурудгоҳ қарор доштаанд.

Фарзонаи УМАРАЛӢ, “ҶТ”