Тибқи маълумоти омори гумрукӣ, дар давоми соли 2025 ба Ҷумҳурии Тоҷикистон 191 ҳазор тонна шакар ба маблағи 117,5 миллион доллар ворид гардидааст. Нархи миёнаи як тонна шакари воридотӣ 615 долларро ташкил дода, нисбат ба ҳамин давраи соли 2024 ба андозаи 34 доллар коҳиш ёфтааст.

Дар ин бора имрӯз - 6 феврал Ҳайдаралӣ Раҷабзода, сардори Хадамоти зиддиинҳисории назди Ҳукумати Ҷумҳурии Тоҷикистон зимни нишасти матбуотӣ иттилоъ дод.

Ба қавли сардори Хадамот ҳаҷми воридоти шакар дар муқоиса ба соли гузашта 9,7 ҳазор тонна ё 4,8 фоиз кам шудааст.

Гуфта шуд, ки бозори воридоти шакар дар ҷумҳурӣ рақобатпазир буда, иштирокчиёни бозори молӣ 69 субъекти хоҷагидорро ташкил медиҳанд, ки нисбат ба ҳамин давраи соли гузашта 19 субъекти хоҷагидор зиёд аст.

Мувофиқи маълумоти омори гумрукӣ, арзиши миёнаи 1 тонна шакари воридотӣ вобаста ба кишвари истеҳсолкунанда фарқ мекунад. Аз ҷумла, шакар аз Федератсияи Россия бо нархи миёнаи 613 доллар, аз Ҷумҳурии Беларус 974 доллар ва аз Ҷумҳурии Ҳиндустон 514 долларро ташкил медиҳад.

Малика МУҚАДДАМОВА "ҶТ"