Муҳаммад Абдураҳмон, сарходими илмии Институти фалсафа, сиёсатшиносӣ ва ҳуқуқи ба номи А. Баҳоваддинови Академияи миллии илмҳои Тоҷикистон гуфт, ки сохтмони канали Қуштеппа аз нуқтаи назари сиёсӣ барои кишварҳои Осиёи Марказӣ ояндаи хатарнок дорад.

Ин нуқтаро ӯ имрӯз зимни нишасти хабарии ниҳоди мазкур иброз дошт.

Аз ҷумла, ӯ зикр кард, ки гарчанде барои Тоҷикистон зарари зиёд надорад, вале ба кишварҳои Ӯзбекистон, Туркманистон ва Қазоқистон таъсири манфӣ дорад ва оянда таҳдидҳои зиёде ба Осиёи Марказӣ аз ин канал сар мезанад.

- Канали Қуштеппа аз нуқтаи назари сиёсӣ барои кишварҳои Осиёи Марказӣ бисёр ояндаи хатарнок дорад. Дар минтақае, ки дарозиаш 250 км аст, аллакай баъзе садамаҳо низ рӯх доданд, ки об ба заминҳо рафтанд ва заминҳо аз кор баромаданд. Мутахассисон ин масъаларо медонистанд,- иброз дошт Муҳаммад Абдураҳмон.

Гуфта шуд, ки сари масъалаи канили Қуштеппа аввалин маротиба олимони тоҷик кор карда буданд. “Олимони ҳамсоя як сол баъди мо сари масъалаи Қуштеппа баргаштанд”.

Гуфта мешавад, ки корҳои сохтмони қисмати дуюми лоиҳаи сохтмони канали Қуштеппа дар Афғонистон 58% иҷро шудааст ва баъди 5 сол он мавриди истифода қарор мегирад.

Ёдовар мешавем, ки Канали Қуштеппа баъд аз ба сари қудрат олмадани Толибон (гурӯҳи мамнуъ дар Тоҷикистон) дар соли 2021, ҳама корҳо барои оғози сохтмони Қуштеппа омода буд.
Толибон сохтмони Қуштеппаро тарҳи миллӣ ва афзалиятнок эълон карданд ва соли 2022 ба сохтмони он шуруъ намуданд.

Фарзонаи УМАРАЛӢ, “ҶТ”