Имрӯз Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар майдони Қасри миллат Шаҳбоз Шариф, сарвазири Ҷумҳурии Исломии Покистонро истиқбол гирифтанд.

Маросими истиқбол бо гузориши командири қаровули фахрӣ, садо додани сурудҳои миллии ду кишвар, гузаштан аз назди сафи қаровули фахрӣ, арзи эҳтироми меҳмони олимақом ба Парчами давлатии Тоҷикистон ва шиносоӣ бо ҳайатҳои расмии ду ҷониб ҷараён гирифта, бо қадамзании мутантан ва гузаштани ҷузъу томҳои қаровули фахрӣ аз назди Пешвои миллат ва меҳмони воломақом анҷом ёфт.

Чигунае, ки қаблан хабар дода будем, Шаҳбоз Шариф, сарвазири Ҷумҳурии Исломии Покистон имрӯз ба шаҳри Душанбе ташриф оварданд ва дар Фурудгоҳи байналмилалии Душанбе меҳмони олимақомро Қоҳир Расулзода, Сарвазири Ҷумҳурии Тоҷикистон ва дигар шахсони расмӣ истиқбол гирифта буданд.

Гуфта мешавад, ки дар доираи ин сафар мулоқоту музокироти сатҳи баланди давлатӣ байни Ҷумҳурии Тоҷикистон ва Ҷумҳурии Исломии Покистон пешбинӣ гардида, доираи васеи ҳамкории дуҷониба баррасӣ мешавад. Ба имзо расидани бастаи санадҳои байниҳукуматӣ ва байнисоҳавӣ низ дар назар аст.

Ҳамчунин тибқи барномаи сафар Сарвазири Ҷумҳурии Исломии Покистон бо Раиси Маҷлиси намояндагони Маҷлиси Олии Ҷумҳурии Тоҷикистон ва Сарвазири Ҷумҳурии Тоҷикистон мулоқот хоҳад кард.

Ёдовар мешавем, ки сафари Шаҳбоз Шариф ба Тоҷикистон нахустин сафари кории хориҷӣ пас аз интихоб шуданаш ба маснади Сарвазири Ҷумҳурии Исломии Покистон аст.