Имрӯз - 3 феврал дастаи алоҳидаи таъиноти махсуси милитсия “Шоҳин”-и Раёсати Вазорати корҳои дохилӣ дар шаҳри Душанбе бо мақсади иштирок дар мусобиқаи байналмилалии “UAESWATChallenge” ба шаҳри Дубайи Аморати Муттаҳидаи Араб сафар намуд.

Дар ин бора саҳифаи фейсбукии Раёсати ВКД дар шаҳри Душанбе хабар дода, зикр мекунад, ки дар мусобиқаи мазкур 114 даста аз 48 кишвари ҷаҳон иштирок намуда, мусобиқа аз 7 то 11-уми феврали соли равон идома меёбад.

Ҳамзамон, сомонаи русии “Русские Эмираты” фонди умумии ҷоизаҳои мусобиқаро 260 000 доллари ИМА муайян кардааст ва менависад, ки ин маблағ мақоми “UAE SWAT Challenge”-ро ҳамчун бузургтарин ва бонуфузтарин мусобиқаи воҳидҳои тактикии ҷаҳон тасдиқ мекунад.

Инчунин, ба таъкиди масъулин иштироки дастаи “Шоҳин” дар ин чорабинии байналмилалӣ ба баланд бардоштани малакаи касбӣ, табодули таҷриба ва муаррифии неруҳои ҳифзи ҳуқуқи Ҷумҳурии Тоҷикистон дар арсаи ҷаҳонӣ мусоидат хоҳад кард.

Лозим ба зикр аст, ки мусобиқаи “UAE SWAT Challenge”-яке аз бузургтарин ва бонуфузтарин мусобиқаҳои байналмилалӣ миёни воҳидҳои махсуси полис ва қувваҳои вокуниши фаврӣ дар ҷаҳон аст. Он ҳар сол дар шаҳри Дубай бо ташаббуси Полиси Дубай баргузор мешавад.

Гулафшон КАРИМОВА, “ҶТ”