Соли 2025 дар доираи бизнес-форумҳо, бизнес-миссияҳо, вохӯриҳо ва дигар чорабиниҳои тиҷоратӣ миёни соҳибкорони ватанӣ ва шарикони хориҷӣ 73 санад оид ба ҳамкорӣ ба имзо расонида шудааст.

Дар ин хусус, Фарҳодшоҳ Раҳмонализода, раиси Палатаи савдо ва саноати Ҷумҳурии Тоҷикистон иттилоъ дода, қайд кард, ки ҷиҳати шинос шудан бо технологияи муосири истеҳсолӣ ва пайдо намудани шарикони тиҷоратӣ аз дигар кишварҳо бо мусоидати Палатаи савдо ва саноати Ҷумҳурии Тоҷикистон зиёда аз 2 ҳазору 402 нафар соҳибкор аз намоишгоҳҳои хориҷӣ дидан намуда, дар бизнес-форумҳо, бизнес-миссияҳо, вохӯриҳо ва дигар чорабиниҳои тиҷоратӣ ба таври ҳузурӣ ва маҷозӣ иштирок намудаанд.

Ҳамчунин, ба гуфтаи раиси Палатаи савдо ва саноат аз санадҳои баимзорасида 36 адади онҳоро Ёддошти тафоҳум оид ба ҳамкорӣ, 21 шартнома вобаста ба содироти молу маҳсулот аз Ҷумҳурии Тоҷикистон ба кишварҳои хориҷ ва 16 шартномаи дигар оид ба хариди молу маҳсулот, таҷҳизот аз кишварҳои хориҷ барои ворид ба Ҷумҳурии Тоҷикистон ташкил медиҳанд.

Гулафшон КАРИМОВА, “ҶТ”